दसैँमा जुवातास खेल्ने १७ जना ललितपुर र चितवनबाट पक्राउ

काठमाडौं । दसैँका बेला जुवातास खेलिरहेको अवस्थामा ललितपुर र चितवनबाट १७ जना पक्राउ परेका छन्। प्रहरीले उनीहरूको साथबाट कुल ३ लाख ५३ हजार ८३५ रुपैयाँ र सात बुक तास बरामद गरेको छ।

ललितपुरको महालक्ष्मी नगरपालिका–४, ढुङ्गेसाँघु इमाडोलस्थित एक होटलमा सोमबार बेलुकी जुवातास खेलिरहेको अवस्थामा चार जना पक्राउ परेका हुन्। जिल्ला प्रहरी परिसर ललितपुरबाट खटिएको टोलीले उनीहरूको साथबाट ६७ हजार ८०० रुपैयाँ र एक बुक तास बरामद गरेको जनाएको छ।

त्यस्तै, चितवनको भरतपुर महानगरपालिका–२, क्षेत्रपुरमा डेरा गरी बस्ने धनुषाका ३६ वर्षीय विशाल चौधरीको कोठामा जुवातास खेलिरहेको अवस्थामा चौधरीसहित आठ जना पक्राउ परेका छन्। उनीहरूको साथबाट १ लाख १७ हजार ४०० रुपैयाँ र तीन बुक तास बरामद भएको प्रहरीले जनाएको छ।

यसैगरी, भरतपुर महानगरपालिका–२२, पटिहानीस्थित होटल रिभरसाइडमा जुवातास खेलिरहेको अवस्थामा होटल सञ्चालक ५० वर्षीय प्रेम ठकुरीसहित पाँच जना पक्राउ परेका छन्। प्रहरीले उनीहरूको साथबाट १ लाख ६८ हजार ६३५ रुपैयाँ र तीन बुक तास बरामद गरेको छ। तीनवटै घटनामा पक्राउ परेकाहरूमाथि आवश्यक अनुसन्धान भइरहेको प्रहरीले जनाएको छ।