राखी सावन्तविरुद्ध झाँसी अदालतबाट गैरजमानती वारेन्ट जारी

झाँसी । भारतीय अभिनेत्री राखी सावन्तविरुद्ध झाँसी अदालतले शनिबार गैरजमानती पक्राउ पुर्जी (एनबीडब्ल्यू) जारी गरेको छ। अदालतले उनलाई र उनको टोलीका सदस्यलाई पक्राउ गरी सन् २०२६ डिसेम्बर १ मा उपस्थित गराउन प्रहरीलाई निर्देशन दिएको छ।

यो मुद्दा १६ वर्षअघि प्रसारित टेलिभिजन कार्यक्रम ‘राखी का इन्साफ’सँग सम्बन्धित छ। कार्यक्रममा झाँसीका २४ वर्षीय लक्ष्मणप्रसाद अहिरवारलाई अपमानित गरिएको र त्यसको केही दिनपछि उनले आत्महत्या गरेको आरोप छ।

सिभिल जज जुडिसियल (एफटीसी सिएडब्ल्यू) अञ्जलीको अदालतले राखी र उनको टोलीविरुद्ध पक्राउ पुर्जी जारी गरेको हो। प्रेमनगर थाना क्षेत्रका बासिन्दा तथा तरकारी व्यापारी लक्ष्मणप्रसादलाई सन् २०१० मा प्रसारित कार्यक्रममा पत्नी र परिवारका सदस्यकै अगाडि ‘नामर्द’ र ‘नपुंसक’ भनिएको आरोप छ।

घटनापछि मृतककी आमाको उजुरीका आधारमा प्रेमनगर प्रहरीले राखी सावन्त र उनको टोलीविरुद्ध मुद्दा दर्ता गरी अनुसन्धान थालेको थियो। प्रहरीले अदालतमा आरोपपत्र पेस गरेपछि मुद्दाको सुनुवाइ हुँदै आएको छ। तर, राखी अदालतमा उपस्थित नभएपछि अक्टोबर १६ मा उनीविरुद्ध गैरजमानती पक्राउ पुर्जी जारी गरिएको हो।

पक्राउ पुर्जीबारे प्रतिक्रिया दिँदै राखीले आफू कार्यक्रमकी प्रस्तोता मात्र भएको र च्यानलले जे भन्न लगायो, त्यही बोलेको दाबी गरेकी छन्। जेल जानुपरे पनि आफू तयार रहेको उनको भनाइ छ। मुद्दाको आगामी सुनुवाइ डिसेम्बर १ मा हुनेछ।