कास्कीमा अनलाइन ठगीको अवस्था भयावह, साढे १० करोड भन्दा बढी रकम ठगी

कास्की — कास्की जिल्लामा अनलाइन मार्फत हुने ठगीको समस्या तीव्र रुपमा बढिरहेको छ। चालू आर्थिक वर्षको हालसम्म साढे १० करोड भन्दा बढी रकम अनलाइन ठगीको शिकार भएको उजुरी परेको छ। जिल्ला प्रहरी कार्यालय कास्कीका अनुसार, साउनदेखि पुससम्म १० करोड ६३ लाख ५३ हजार रुपैयाँको अनलाइन ठगी भएको पुष्टि भएको हो।

विशेषगरी, कात्तिक महिनामा ठगीको रकम सबैभन्दा धेरै भएको पाइन्छ। चाडपर्वको समयमा मात्रै विभिन्न डिजिटल प्लेटफर्महरू मार्फत ३ करोड १४ लाख ३३ हजार रुपैयाँभन्दा बढी ठगी भएको प्रहरीको दावी छ। यसैगरी, पुसमा पनि ठगीको मात्रा उकालो लाग्दै २ करोड ४९ लाख पुगेको छ। यसअघि साउनमा १ करोड ५ लाख, भदौमा १ करोड ५० हजार, असोजमा १ करोड ८९ हजार र मङ्सिरमा १ करोड ४ लाख रुपैयाँको अनलाइन ठगी भएको थियो।

ठगीको रकम तदारुकता साथ फिर्ता गराउने प्रयास भने कमजोर देखिएको छ। हालसम्म मात्र १ करोड ५५ लाख रुपैयाँ पीडितहरूले फिर्ता पाएका छन्। सबैभन्दा धेरै रकम मङ्सिरमा १ करोड २३ हजार रुपैयाँ फिर्ता गरिएको थियो भने, कात्तिकमा मात्र १ लाख ७० हजार रुपैयाँ फिर्ता भएको हो। त्यसैगरी, साउनमा १९ लाख, भदौमा १० लाख, असोजमा ७ लाख र पुसको हालसम्म १६ लाख ११ हजार रुपैयाँ फिर्ता भएको छ।

ठगीमा मुख्य रूपमा सामाजिक सञ्जालहरू— टिकटक, फेसबुक, इन्स्टाग्राम, र टेलिग्रामलाई प्रयोग गरिएको देखिएको छ। दर्ता भएका ५ सय ८७ उजुरीमध्ये सबैभन्दा बढी टिकटकबाट १५८ र फेसबुकबाट १४४ घटना भएका छन्। यसैगरी, इन्स्टाग्रामबाट ४५, टेलिग्रामबाट ४७ र फोनमार्फत १८ र ओटिपी कोड मागेर २४ जना ठगीमा परेका छन्।

सामाजिक सञ्जाल र डिजिटल वालेटहरू जस्तै खल्ती, ई–सेवा र बैंक खाताको दुरुपयोग गरी ठगी गर्ने क्रम बढ्दो छ। प्रहरीले उच्च सतर्कता अपनाउन र अपरिचित व्यक्तिसँग आर्थिक कारोबार गर्दा सावधानी अपनाउन आग्रह गरेको छ।

अर्थमन्त्रीको तथ्यांकअनुसार, आर्थिक वर्ष २०८०/८१ मा ७ सय ५१ उजुरी दर्ता भएका थिए, जसमा ८ करोड ७९ लाख रुपैयाँको ठगी भएको थियो। यस मध्ये केवल २ करोड १९ लाख मात्रै फिर्ता गराउन सफल भएको थियो। यसैगरी, अघिल्लो वर्ष, २०७९/८० मा ४ सय २ उजुरी र ४ करोड ३५ लाख रुपैयाँको ठगी भएको थियो, जसमा जम्मा ५७ लाख ५२ हजार रुपैयाँ मात्र फिर्ता गरिएको थियो।

प्रहरी र सरकार दुवै अनलाइन ठगी नियन्त्रण र सजगता बढाउन प्रतिबद्धता व्यक्त गर्दै, सर्वसाधारणलाई सचेत रहन र अनावश्यक जोखिमबाट टाढा रहन सुझाव दिइएको छ।