रुपन्देहीमा एक किलो सुनका गरगहनासहित काठमाडौंकी महिला पक्राउ

काठमाडौं । सशस्त्र प्रहरी बल नेपालले रुपन्देहीबाट एक किलोग्राम सुनका गरगहनासहित एक महिलालाई पक्राउ गरेको छ। सशस्त्र प्रहरीका सहप्रवक्ता डीएसपी शैलेन्द्र थापाका अनुसार सिद्धार्थनगर नगरपालिका–१, शान्तिगेटबाट बुधबार राति काठमाडौं महानगरपालिका–१९ की ४६ वर्षीया इला पटेल पक्राउ परेकी हुन्।

भारतबाट नेपालतर्फ आउँदै गरेकी पटेललाई विशेष सूचनाका आधारमा सशस्त्र प्रहरी बल नेपाल सीमा सुरक्षा गुल्म डण्डाबाट खटिएको टोलीले नियन्त्रणमा लिएको हो। बरामद गरगहनाको सिद्धार्थनगरका सुनचाँदी व्यवसायीबाट परीक्षण गराउँदा तौल एक किलोग्राम रहेको पुष्टि भएको डीएसपी थापाले बताए।

सशस्त्र प्रहरीका अनुसार बरामद सुनको मूल्य २ करोड ५१ लाख ९३ हजार ३५० रुपैयाँ छ। पटेललाई बरामद सुनसहित आवश्यक कारबाहीका लागि भैरहवा भन्सार कार्यालय, रुपन्देहीमा बुझाइएको छ।