सिरहा सीमा क्षेत्रमा सशस्त्र प्रहरी बलको कडाइ, १५.५ लाख रुपैयाँको अवैध सामान जफत

सिरहा — सशस्त्र प्रहरी बल, नेपाल नं. ७ गण हेडक्वार्टर सिरहाले एसपी सुमनजंग थापाको नेतृत्वमा जिल्लाका विभिन्न सीमा क्षेत्रमा निगरानी तथा गस्तीलाई थप कडाइ गर्दै अवैध सामान बरामद गर्न सफल भएको छ। भदौ २२ गते गरिएको जाँचका क्रममा करिब १५ लाख ५६ हजार ५ सय ७५ रुपैयाँ बराबरको विभिन्न प्रकारका अवैध सामानहरू जफत गरिएको हो।

जफत भएका सामानहरूमा लत्ताकपडा, मोटरसाइकल, किराना सामान, सुर्ती, बीउबिजन, कस्मेटिक सामग्री, पेय पदार्थ, मदिरा र इन्धन समावेश छन्। साथै, सीसी क्यामेरा, मनिटर, हार्डड्राइभ, कीटनाशक विषादी र पानी तान्ने मोटरसमेत बरामद गरिएको छ। यस सम्बन्धमा प्रहरीले भनेको छ कि, बरामद सामानहरू आवश्यक कानुनी प्रक्रिया पूरा गरेपछि सिरहा भन्सार कार्यालयमा आवश्यक दस्तुरसहित दर्ता गरिएको छ।

यो अभियान एसपी सुमनजंग थापाको निर्देशनमा सीमा क्षेत्रको निगरानी, गस्ती र चेकजाँचलाई थप प्रभावकारी बनाउने उद्देश्यले सञ्चालन गरिएको हो। प्रहरीले भनेको छ कि, अवैध ओसारपसार नियन्त्रणका लागि थप कडाइका साथ निगरानी र गस्तीहरू जारी रहनेछ। यस कार्यवाहीले सीमावर्ती क्षेत्रको सुरक्षा र कानुनी अनुशासन कायम राख्न मद्दत पुग्ने विश्वास व्यक्त गरिएको छ।