महोत्तरीमा इँटाभट्टाबाट ठूलो मात्रामा मदिराजन्य पदार्थ बरामद

महोत्तरी । महोत्तरी जिल्लाको भंगहा नगरपालिका–५, ढकिया टोलस्थित एक इँटाभट्टाबाट प्रहरीले मदिराजन्य पदार्थ बरामद गरेको छ। जिल्ला प्रहरी कार्यालय महोत्तरीका प्रहरी प्रवक्ता शैलेन्द्र भट्टका अनुसार, लुकाइछिपाइ राखिएको उक्त मदिराजन्य पदार्थलाई प्रहरीले नियन्त्रणमा लिएको हो।

प्रहरीका अनुसार, इँटाभट्टाबाट ३ कार्टुन अर्ना बियर, ७ कार्टुन कर्णाली गोल्ड, ३ कार्टुन ब्रिक्स वाइन र १७ बोत्तल ब्ल्याक ओके मदिराजन्य पदार्थ जफत गरिएको छ। यस सम्बन्धमा थप अनुसन्धान जारी रहेको प्रहरीको भनाइ छ।

जिल्ला प्रशासन कार्यालय महोत्तरीले आगामी प्रतिनिधि सभा सदस्य निर्वाचनलाई शान्तिपूर्ण, सुरक्षित र व्यवस्थित रुपमा सम्पन्न गर्न फाल्गुन १४ गतेदेखि नै मदिरा बिक्री, वितरण र सेवनमा प्रतिबन्ध लगाएको छ। निर्वाचनको पूर्वसन्ध्यामा ठूला मात्रामा मदिराजन्य पदार्थ भेटिएपछि प्रहरीले जफत गरेको हो।

प्रहरीका अनुसार, उक्त इँटाभट्टामा करिब २५० जना मजदुरको कार्यरत रहेको र त्यहाँ कुनै पार्टीको झण्डा वा प्रचार सामग्री भेटिएको छैन। प्रहरीले भने, बरामद मदिराजन्य पदार्थलाई नियन्त्रणमा लिई अनुसन्धान सुरु गरेको छ।

यस घटना संगै, महोत्तरी जिल्लामा निर्वाचनको सुरक्षा र शान्तिपूर्ण वातावरण सुनिश्चित गर्न थप कडाइका साथ निगरानी भइरहेका छन्।