ट्रम्प र पुटिनबीच पहिलो पटक टेलिफोन वार्ता, ऊर्जा संकट र युक्रेन युद्धका विषयमा छलफल

अमेरिकाका राष्ट्रपति डोनाल्ड ट्रम्प र रुसी राष्ट्रपति भ्लादिमिर पुटिनबीच सोमबार पहिलो पटक टेलिफोन वार्ता भएको छ। यस वार्तामा विश्वव्यापी ऊर्जा संकट, इरान युद्ध, र युक्रेन युद्धको अवस्थाका साथै विश्व बजारमा कच्चा तेलको मूल्यवृद्धि जस्ता गम्भीर विषयहरूमा चर्चा भएको थियो।

वार्तामा मुख्य रूपमा, इरानमा जारी युद्ध, युक्रेनमा शान्ति सम्भावना, र विश्व बजारमा देखिएको ऊर्जा संकटबारे विचार-विमर्श भएको थियो। २०२२ मा इरानमाथि अमेरिका र इजरायलको आक्रमणपछि स्ट्रेट अफ होर्मुजको जलमार्ग बन्द हुँदा र युक्रेनमा रुसी आक्रमणपछि देखिएको ऊर्जा अभावको समस्या अहिले विश्व अर्थतन्त्रमा गम्भीर रुपमा देखिएको छ।

ट्रम्पले आफ्नो फ्लोरिडास्थित गल्फ क्लबमा आयोजित पत्रकार सम्मेलनमा पुटिनसँगको कुराकानी फलदायी भएको बताएका छन्। उनले भने, “पुटिनले इरान मामिलामा सहयोग गर्न इच्छुक देखाएका छन्।” यसै क्रममा, ट्रम्पले रुस-युक्रेन युद्ध अन्त्य गर्न र थप सहयोग गर्न रुसी राष्ट्रपति पुटिनलाई आग्रह गरेका थिए।

अर्कोतर्फ, पुटिनले इरानमाथि जारी युद्धले विश्व ऊर्जा बजारलाई जोखिममा पार्दै आएको चेतावनी दिए। उनले खाडी मुलुकबाट हुने तेल ढुवानी कहिले पनि रोकिएर सक्ने सम्भावनालाई औंल्याएका छन्। साथै, उनले युरोपेली देशहरूलाई दीर्घकालीन सहकार्यका लागि तयार रहेको र रूस पुनः ग्यास र तेल उपलब्ध गराउन तयार रहेको संकेत दिएका छन्।

अमेरिकी प्रशासनले ऊर्जा संकटलाई सम्बोधन गर्न र रुसी तेलको बजारमा प्रवेशलाई सहज बनाउन प्रतिबन्धहरू खुकुलो बनाउने विचार गरिरहेकोछ। यस अन्तर्गत, भारत जस्ता मुलुकहरूले अमेरिकी शुल्क वा दण्डको डर बिना रुसी तेल किन्न पाउने व्यवस्था गर्न छलफल भइरहेको छ। गत हप्ता मात्रै अमेरिकाले भारतलाई समुद्रमा रहेको रुसी कच्चा तेल अस्थायी रूपमा खरिद गर्न अनुमति दिएको थियो।

रुसी विदेश नीति सल्लाहकार युरी उसाकोभले यस वार्तालाई निकै अर्थपूर्ण र भविष्यमुखी मान्दै, यसले दुई देशबीचको सम्बन्ध र कार्यदिशामा सकारात्मक प्रभाव पर्ने बताए। उसाकोभका अनुसार, ट्रम्प पनि युक्रेन युद्धमा तत्काल युद्धविराम र दीर्घकालीन समाधानको पक्षमा देखिएका छन्। यसैबीच, रुसी सेना युक्रेनमाथि क्रमशः अघि बढिरहेको अवस्थामा, किभले वार्ताका विकल्पहरू खोज्ने आवश्यकता देखिएको छ।