जनकपुरधाममा शान्ति र सद्भावको लागि विशाल र्याली, दोषीलाई कारबाहीको माग
- जनकपुरधाम — सुनसरी र सिरहामा भएका घटनाका दोषीलाई तत्काल कानुनी दायरामा ल्याउन माग गर्दै जनकपुरधाममा व्यापक विरोध प्रदर्शन र सद्भाव र्याली आयोजना गरिएको छ।
- प्रशासनिक र सामाजिक नेतृत्वको पहलमा भएको यस कार्यक्रमले समाजमा शान्ति, सुरक्षा र साम्प्रदायिक सद्भाव कायम राख्न जोड दिएको छ।
जनकपुरधाम — सुनसरी र सिरहामा भएका घटनाका दोषीलाई तत्काल कानुनी दायरामा ल्याउन माग गर्दै जनकपुरधाममा व्यापक विरोध प्रदर्शन र सद्भाव र्याली आयोजना गरिएको छ।
प्रशासनिक र सामाजिक नेतृत्वको पहलमा भएको यस कार्यक्रमले समाजमा शान्ति, सुरक्षा र साम्प्रदायिक सद्भाव कायम राख्न जोड दिएको छ। सद्भाव र्याली सम्पन्न भएपछि स्वतःस्फूर्त रूपमा युवाहरूले दोषीलाई कारबाही गर्नुपर्ने माग गर्दै प्रदर्शन सुरु गरेका हुन्।
प्रदर्शनकारीहरूले सुनसरी र सिरहामा भएका घटनामा संलग्न व्यक्तिहरूलाई तुरुन्त पक्राउ गरी कडा भन्दा कडा कारबाही गर्न सरकार र प्रशासनलाई आग्रह गरेका छन्। उनीहरूका अनुसार, यस्तो घटना समाजमा तनाव र विभाजन ल्याउने खालका छन्, जुन कुनै पनि हालतमा स्वीकार्य छैन।
युवाहरूले समाजमा शान्ति र सुरक्षा कायम राख्न राज्यको थप संवेदनशीलता आवश्यक रहेको बताएका छन्। उनीहरूले पीडित परिवारलाई न्याय सुनिश्चित गर्न र अपराधीलाई कुनै पनि बहानामा छुट दिन नहुने धारणा व्यक्त गरेका हुन्।
सद्भाव र्यालीको उद्देश्य सामाजिक सद्भाव र एकतामा आधारित समाज निर्माण हो। जनकपुरधामस्थित रेल्वे स्टेशनबाट सुरु भएको र्यालीले शहरका प्रमुख चोकहरू परिक्रमा गर्दै शान्ति र एकता को सन्देश फैलाएको थियो। यस कार्यक्रममा विभिन्न राजनीतिक दलका नेताहरू, स्थानीय तहका प्रतिनिधिहरू, सुरक्षा निकायका प्रमुखहरू, धर्मगुरुहरू, नागरिक समाजका सदस्यहरू, व्यवसायीहरू र सञ्चारकर्मीहरू सहभागी थिए।
र्यालीमा सहभागीले ‘सामाजिक एकता कायम गरौँ’, ‘शान्ति र सद्भाव कायम गरौँ’ जस्ता नाराहरू बोकेका थिए। राष्ट्रिय स्वतन्त्र पार्टीका सांसद मनिष झालेले जनकपुरधामको सामाजिक सद्भाव र ऐतिहासिक विरासतको चर्चा गर्दै यसलाई जोगाउन सबैको जिम्मेवारी भएको बताए।
प्रशासनिक प्रमुख प्रेमप्रसाद लुइँटेलले मिथिला संस्कृतिले सधैं शान्ति र भाइचाराको सन्देश दिएको बताए। उनले जनतालाई संस्कृति र परम्परालाई सम्मान गर्दै शान्ति र सद्भाव कायम राख्न अपील गरे।
जनकपुरधाम उपमहानगरपालिकाका प्रमुख मनोजकुमार साहले भने, ‘नेपालका राजनीतिक र सामाजिक परिवर्तन शान्तिपूर्ण आन्दोलनबाटै सम्भव भएको हो।’ उनले सबैलाई संवाद र वार्ताको माध्यमबाट आफ्नो माग प्रस्तुत गर्न आग्रह गरे।
यस कार्यक्रमले समाजमा स्थिरता र सामाजिक एकता कायम गर्न महत्वपूर्ण भूमिका खेलेको छ। यसले समुदायलाई असहिष्णुता र विभाजनका विरुद्ध सशक्त सन्देश प्रदान गरेको छ।
प्रतिक्रिया
यो पनि पढौँ
यो पनि पढौँ
