प्रहरीको टोलीले जेनजी आन्दोलनका क्रममा लुटिएको गोलीसहित दुई जनालाई पक्राउ।

प्रहरी प्रभाग कोटेश्वरको टोलीले जेनजी आन्दोलनको क्रममा दरबारमार्गबाट लुटिएका गोलीसहित दुई जनालाई पक्राउ गरेको छ। पक्राउ पर्नेहरूमा बर्दियाको बढैयाताल गाउँपालिका–३ घर भई काठमाडौँको कपनमा बस्ने १७ वर्षीय अनिश गिरी र झापा झिलझिले घर भई काठमाडौँको मालिगाउँ आनन्द भैरव मार्ग बस्ने १६ वर्षीय सोनम थापामगर रहेका छन्।

प्रहरीले शुक्रबार राति नरेफाँट क्षेत्रमा चेकजाँचको क्रममा शंकास्पद अवस्थामा रहेका गिरीलाई नियन्त्रणमा लिएको हो। थप अनुसन्धानका क्रममा उनको साथबाट प्रहरीले लुटिएको तीन थान गोली फेला पारेको छ। गिरीकै बयानका आधारमा झापाका थापामगरसँग पनि गोली रहेको खुल्न आएको हो। उनीहरूको कोठाबाट ३११ २३ लेखिएको पेस्तोलको दुई थान गोली पनि बरामद गरिएको प्रहरीले जनाएको छ।

प्रहरीले दुवैलाई नियन्त्रणमा लिएर थप अनुसन्धान भइरहेको जनाएको छ।