त्रिभुवन विमानस्थलको अव्यवस्था र सुरक्षाका खाल्तीमाथि सांसद भण्डारीको गम्भीर टिप्पणी

काठमाडौँ — राष्ट्रिय स्वतन्त्र पार्टीकी सांसद नीतिमा भण्डारीले त्रिभुवन अन्तर्राष्ट्रिय विमानस्थलको अव्यवस्थित पूर्वाधार, सेवा शुल्क, र सुरक्षाकर्मीको व्यवहारप्रति गम्भीर आपत्ति व्यक्त गरेकी छन्। उनले विमानस्थलमा नागरिकले भोग्नुपरेका समस्याबारे सरकार र सम्बन्धित निकायको ध्यानाकर्षण गराएकी हुन्।

बिहीबार सिंहदरबारमा बसेको अर्थ समितिको बैठकमा सांसद भण्डारीले अन्तर्राष्ट्रिय विमानस्थलमा आफन्तहरूलाई कुर्न जाने सर्वसाधारणबाट शुल्क लिने परिपाटीको आलोचना गरेकी छन्। उनका अनुसार, विकसित देशहरूमा शुल्क तिरेर सुविधासम्पन्न लाउन्जको विकल्प हुन्छ, तर नेपालमा न्यूनतम पूर्वाधार नभई मात्र शुल्क असुलिएको उनको तर्क छ।

अर्का सांसदहरूले पनि विमानस्थलको सुरक्षा व्यवस्था र सेवा शुल्कको मनोमानीप्रति ध्यानाकर्षण गराए। सांसद जगदीश खरेलले पनि सुरक्षा व्यवस्था र प्रतिवेदनलाई बेवास्ता गरिएको र नागरिकमाथि आर्थिक भार थपिएकोप्रति आपत्ति जनाए। उनले औँल्याए, “विमानस्थलको सुरक्षा संवेदनशील विषय हो, र आईकाओको प्रतिवेदनलाई तत्काल अध्ययन गर्न आवश्यक छ।”

सांसद भण्डारीले विमानस्थलको भौतिक पूर्वाधार र सुरक्षाका विषयमा पनि टिप्पणी गर्दै यसलाई सुधार गर्न आवश्यक रहेको बताए। उनले भनिन्, “विमानस्थलको र्‍याम्प र लिफ्टहरू जोखिमपूर्ण छन्। हालै निर्माण भएको ठुलो लिफ्टको प्राविधिक र स्वास्थ्य सुरक्षा समस्या देखिएको छ।“

उनले विमानस्थलमा पर्ने यात्रुहरूको दुःखद अवस्थालाई पनि उजागर गरे। “गाउँबाट आउने नागरिकहरू घण्टौँसम्म कुर्नुपर्छ, तर त्यस्ता व्यवस्थापन छैन। र्‍याम्पको बनावट असुरक्षित छ र यसको सुधार आवश्यक छ,” उनले भनिन्।

सांसद भण्डारीले सुरक्षा र पूर्वाधारको सुधारबारे जोड दिँदै भने, “विमानस्थलको सुरक्षा खाल्तीमाथि ध्यान दिन आवश्यक छ। अनधिकृत गेट र सुरक्षा उल्लंघनले जोखिम थपेको छ। यसलाई तत्काल सुधार गर्नुपर्छ।”

उनले थपे, “राज्यको सम्पत्ति दोहन र नागरिकमाथि शोषण गर्नेलाई चुप बस्न सकिँदैन। सरकार र सम्बन्धित निकायले यस विषयलाई गम्भीरतापूर्वक लिनुपर्छ।” विमानस्थलको वर्तमान अवस्थालाई सुधार गर्न आवश्यक कदम चाल्नुपर्ने र यसले मुलुकको छवि र राष्ट्रको प्रतिष्ठामा सकारात्मक प्रभाव पार्ने उनको धारणा छ।

यस विषयमा संसद र सरकारको ध्यानाकर्षण गराउँदै सांसदहरूले अविलम्ब कदम चाल्नुपर्ने आवश्यकता औँल्याएका छन्।