डिसहोम कर्मचारी बनेर ठगी गर्ने गिरोह नियन्त्रणमा, ३६४ जना सिकार र २९ लाख ठगी

काठमाडौं — काठमाडौं उपत्यका अपराध अनुसन्धान कार्यालयले डिषहोमको कर्मचारी भुनाइ गरी सर्वसाधारणलाई ठगी गर्ने एक गिरोहलाई नियन्त्रणमा ल्याएको छ। विशेष अफरको लोभ देखाएर ग्राहकहरूबाट रकम असुल्ने यस गिरोहलाई प्रहरीले काठमाडौँको टोखा क्षेत्रबाट पक्राउ गरेको हो।

पक्राउ पर्नेमा धादिङकी २२ वर्षीया आरती सिंखडा, दोलखाका २२ वर्षीय विष्णु कार्की र रामेछापका ४७ वर्षीय असल सिंह तामाङ रहेका छन्। उनीहरूले डिसहोमका नियमित ग्राहकहरूलाई फोन गरी ‘एक वर्षको रिचार्ज गर्दा चार महिनाको बोनस रिचार्ज’ उपलब्ध गराउने भ्रामक प्रचार गर्दथे। साथै, उनीहरूले ग्राहकहरूको विश्वास जित्नका लागि नक्कली रसिद र छापको प्रयोग पनि गरेका थिए।

अनुसन्धानले देखाएको छ कि मुख्य योजनाकार आरती सिंखडाले करिब चार वर्षदेखि डिसहोमको सब-डिलर र इन्टरनेट सेवामा काम गर्दै आएको र सोही समयमा बनाएको ग्राहकको विवरण प्रयोग गरी यस ठगीमा संलग्न भएको प्रहरीको दाबी छ। अनुसन्धानका क्रममा प्रहरीले उनीहरूको साथबाट प्रविधि इम्पेक्स प्रालिको छाप, रसिद प्याड, नक्कली परिचयपत्र, र ग्राहकहरूको हिसाब किताब राखिएको डायरी समेत बरामद गरेको छ।

प्रहरीका अनुसार, आरतीले आफ्नै र श्रीमानको इसेवा, खल्ती, र बैंक खातामा रकम जम्मा गर्न लगाएको पाइएको छ। उनले प्रयोग गरेको रसिद र छाप गोंगबुको एक आर्ट पसलबाट नक्कली बनाएर प्रयोगमा ल्याएको पनि पुष्टि भएको छ। प्रारम्भिक अनुसन्धानले देखाएको छ कि यस गिरोहले हालसम्म ३६४ भन्दा बढी व्यक्तिलाई ठगी गरी २९ लाख रुपैयाँभन्दा बढी रकम असुलेको छ।

अहिलेसम्म सात जना पीडितहरूले मात्र कार्यालयमा औपचारिक निवेदन दिएका छन् भने अन्य पीडितहरू पनि सम्पर्कमा आउनेक्रम जारी छ। साथै, आरतीको आफ्नै नम्बरबाट ८६ वटा डिसहोम अकाउन्टहरू खोलिएको पनि प्रहरीले पत्ता लागेको छ। पक्राउ परेकालाई थप अनुसन्धान र कारबाहीका लागि जिल्ला प्रहरी परिसर भद्रकाली पठाइएको छ।

यो गिरोहको उद्भेदनले इन्टरनेट र मोबाइल सेवा प्रयोग गरी हुने ठगीको खतरा अझै बढेको देखिएको छ। प्रहरीले यस्तो क्रियाकलापलाई गम्भीर रूपमा लिई थप कदम चाल्ने जनाएको छ।