भोजपुर गाउँपालिकाबाट करसम्बन्धी सेवा सहज र प्रभावकारी रूपमा सञ्चालन
- भोजपुर – भोजपुरको पौवादुङमा गाउँपालिकाबाट करसम्बन्धी सेवा सञ्चालनको नयाँ पहल सुरु भएको छ।
- जिल्लाबाट करदाता सेवा कार्यालय हटेपछि नागरिकलाई सहज, छिटो र प्रभावकारी सेवा उपलब्ध गराउने उद्देश्यले गाउँपालिकाले आन्तरिक राजस्व कार्यालय धरानसँग समझदारीपत्रमा हस्ताक्षर गरेको हो।
भोजपुर – भोजपुरको पौवादुङमा गाउँपालिकाबाट करसम्बन्धी सेवा सञ्चालनको नयाँ पहल सुरु भएको छ। जिल्लाबाट करदाता सेवा कार्यालय हटेपछि नागरिकलाई सहज, छिटो र प्रभावकारी सेवा उपलब्ध गराउने उद्देश्यले गाउँपालिकाले आन्तरिक राजस्व कार्यालय धरानसँग समझदारीपत्रमा हस्ताक्षर गरेको हो। यस कदमले स्थानीय तहबाट करसम्बन्धी सेवा प्रवाहलाई सहज बनाउने र सेवाग्राहीको पहुँचमा वृद्धि गर्न टेवा पुर्याउने विश्वास गरिएको छ।
सरकारको २०८२ कात्तिक १७ को निर्णयअनुसार, साविक करदाता सेवा कार्यालयबाट प्रदान हुँदै आएका केहि सेवाहरू अब स्थानीय तहबाटै उपलब्ध गराइने सहमति भएको छ। यसले सेवा प्रवाहमा भएको दूरी र जटिलता कम हुने र सेवाग्राहीलाई आवश्यक सेवामा छिटो पुग्न सहज हुने अपेक्षा गरिएको छ।
समझदारीअनुसार, गाउँपालिकाले आफ्नो क्षेत्रभित्र बसोबास गर्ने प्राकृतिक व्यक्तिलाई व्यक्तिगत स्थायी लेखा नम्बर (PAN) जारी गर्नेछ भने, स्थानीय तहमा दर्ता भएका व्यवसाय तथा निकायलाई व्यावसायिक स्थायी लेखा नम्बर (VAT) उपलब्ध गराउनेछ। यससँगै, मूल्य अभिवृद्धि कर (VAT) दर्ताका लागि आवश्यक कागजात संकलन गरी सम्बन्धित कार्यालयमा सिफारिस गर्ने, अन्तःशुल्क इजाजतपत्र सम्बन्धी प्रक्रिया सहजीकरण गर्ने, र कर चुक्ता प्रमाणपत्रका लागि सिफारिस गर्ने सेवा पनि गाउँपालिकाबाटै प्रदान गरिनेछ।
यस नयाँ व्यवस्था अनुसार, करदाता दर्ता विवरण संशोधन, करसम्बन्धी शिक्षा र सचेतनामूलक कार्यक्रम सञ्चालनमा गाउँपालिकाले सहकार्य गर्नेछ। यसले स्थानीय करदातालाई आयकर, मूल्य अभिवृद्धि कर र अन्तःशुल्कसम्बन्धी कानुनी प्रक्रिया बुझ्न थप सहजता ल्याउने विश्वास गरिएको छ।
सम्झौता अनुसार, सेवा चैत ५ गतेदेखि औपचारिक रुपमा सञ्चालनमा आउनेछ। गाउँपालिका अध्यक्ष किरण राईका अनुसार, यस पहलको मुख्य उद्देश्य स्थानीय नागरिकका लागि करसम्बन्धी प्रक्रिया सरल र पहुँचयोग्य बनाउने हो। प्रमुख प्रशासकीय अधिकृत नवीन भट्टराईले भने, सम्झदारीपत्रमा उल्लिखित विषयअनुसार करसम्बन्धी काम गाउँपालिकाबाटै प्रभावकारी रूपमा सञ्चालन गरिने जानकारी दिए।
यस सहकार्यले राजस्व प्रशासनलाई नागरिकमैत्री बनाउने, सेवा प्रवाह छिटोछरितो बनाउने र सङ्घीय संरचनाअनुसार अधिकार कार्यान्वयनमा टेवा पुर्याउने अपेक्षा गरिएको छ। यस कदमले भोजपुर जिल्लाका नागरिकलाई करसम्बन्धी सेवामा सहजता र विश्वसनीयता प्रदान गर्ने विश्वास गरिएको छ।
प्रतिक्रिया
यो पनि पढौँ
यो पनि पढौँ
