मदरसा शिक्षा विधेयकको सैद्धान्तिक स्वीकृतिपछि वीरगन्जमा प्रदर्शन तीव्र, मुख्यमन्त्री यादवको पुतला दहन

पर्सा । मधेस प्रदेशका मुख्यमन्त्री सरोजकुमार यादवले मंगलबार मदरसा शिक्षा विधेयकलाई सैद्धान्तिक स्वीकृति प्रदान गरेपछि वीरगन्जमा तीव्र विरोध प्रदर्शन भएको छ। प्रदेश सरकारको सो निर्णयविरुद्ध आक्रोशित स्थानीयहरूले वीरगन्ज बजार क्षेत्रमा मुख्यमन्त्री यादवको पुतला दहन गर्दै विरोध जनाएका हुन्।

सर्वोच्च अदालतले विश्वासको मतका विषयमा जारी गराएको आदेश विपरीत मन्त्रिपरिषद् बैठक बसेर मुख्यमन्त्री यादवले ६ बुँदे निर्णय गरेको भन्दै प्रदर्शनकारीहरू आक्रोशित बनेका थिए। सोही बैठकले शिक्षा तथा संस्कृति मन्त्रालय, मधेस प्रदेशलाई मदरसा शिक्षा सम्बन्धी विधेयक तयार पार्न सैद्धान्तिक स्वीकृति दिएको थियो।

यसअघि पूर्व मुख्यमन्त्री लालबाबु राउतको कार्यकालमा पनि मदरसा शिक्षा विधेयक अघि बढाउने प्रयास भएको थियो। तर व्यापक विरोध तथा विवाद उत्पन्न भएपछि विधेयक स्थगित गरिएको थियो। अहिले पुनः त्यही विधेयकलाई अघि बढ़ाउने संकेत मुख्यमन्त्री यादवबाट आएको भन्दै मधेसमा पुनः असन्तुष्टि तीव्र बनेको छ।

प्रदर्शनकारीहरूले अदालतको आदेश विपरीत निर्णय भएको, संवेदनशील विधेयकलाई बिना विस्तृत छलफल अघि सारिएको र प्रदेशको सामाजिक सन्तुलन प्रभावित पार्न खोजिएको आरोप लगाएका छन्। उनीहरूले विधेयक तत्काल रोक्न प्रदेश सरकारलाई दबाब दिँदै शान्तिपूर्ण तर कडा ढंगले विरोध प्रदर्शन जारी राखेका छन्।