जसपा नेपालले सार्वजनिक गर्यो २८ बुँदे मुख्य माग: संविधान संशोधनदेखि जेनजी आन्दोलनका मुद्दा समाधानसम्म

काठमाडौँ । जनता समाजवादी पार्टी (जसपा) नेपालले आफ्नो २८ बुँदे मुख्य माग र राष्ट्रिय मुद्दाहरू सार्वजनिक गरेको छ। पार्टीले संविधान संशोधन, संघीयता सबलीकरण, भ्रष्टाचार नियन्त्रण, जेनजी आन्दोलनका माग सम्बोधनलगायत मुलुकको वर्तमान राजनीतिक अवस्थालाई चिर्न आवश्यक ठानेका विषयहरू स्पष्ट रूपमा अघि सारेको जनाएको छ।

जसपा नेपालका प्रचार विभाग प्रमुख पूर्ण बस्नेतका अनुसार देशमा उत्पन्न बहुआयामिक संकट समाधानका लागि संविधान संशोधन वा आवश्यक परे पुनर्लेखन अपरिहार्य रहेको पार्टीको निष्कर्ष छ। उनले भने, “संविधानका आधारभूत खामोका कारण राज्यशक्तिको प्रभावकारी वितरण हुन सकेको छैन। त्यसैले राष्ट्रिय समस्याको स्थायी समाधानका लागि संविधान संशोधन अत्यावश्यक छ।”

राज्य पुनर्संरचनामा १०+१ मोडेलको प्रस्ताव

जसपाले राष्ट्रिय–जातीय पहिचान झल्कने गरी राज्य पुनर्संरचना हुनुपर्ने दाबी गर्दै २०६८ सालको उच्च स्तरीय राज्य पुनर्संरचना आयोगको सुझाव अनुसार १०+१ संरचना लागू गर्नुपर्ने माग पुनः दोहो¥याएको छ। पार्टीका अनुसार यो संरचना देशको बहुजातीय, बहुभाषिक र विविध सांस्कृतिक पहिचानलाई सम्मानित गर्ने सबैभन्दा प्रभावकारी मोडेल हो।

जेनजी आन्दोलनका माग तत्काल सम्बोधन गर्नुपर्ने

पार्टीले जेनजी (Gen-Z) पुस्ताले आन्दोलनका क्रममा अघि सारेका न्यायोचित मुद्दाहरूलाई सरकारले बेवास्ता गरेको आरोप लगाउँदै ती माग तत्काल सम्बोधन गर्न सरकारलाई आग्रह गरेको छ।
जसपाले सरकारले आन्दोलन दमनका क्रममा भएका हत्या, हिंसा, आगजनी र विध्वंश सम्बन्धी घटनाहरूको छानबिन गरी दोषी प्रमाणित भएकामाथि कानूनी कारबाही गर्नुपर्ने जनाएको छ।

भ्रष्टाचार विरुद्ध कडा र स्पष्ट अडान

पार्टीले देशमा फैलिएको संरचनागत भ्रष्टाचार नै राजनीतिक अस्थिरताको मूल कारण बनेको बताउँदै विगतका सरकारहरूमा भएका ठूलादेखि साना सबै प्रकारका भ्रष्टाचारको निष्पक्ष छानबिन तथा दोषीमाथि कानूनअनुसार कडा कारबाही गर्न माग गरेको छ।
जसपा नेपालका अनुसार सुशासन, पारदर्शिता र जवाफदेहिताको अभावले राज्य नागरिकप्रति गम्भीर रूपमा गैरजिम्मेवार बन्दै गएको छ, जसलाई तत्काल सुधार्नुपर्ने पार्टीको निष्कर्ष छ।

मंसिर १० गतेदेखि संघर्ष कार्यक्रम घोषणा

पार्टीले उठाउँदै आएका २८ बुँदे माग तथा राष्ट्रिय मुद्दाहरूलाई संस्थागत रूपमा अगाडि बढाउने उद्देश्यले केन्द्रीय कार्यकारिणी समितिको बैठकले विभिन्न संघर्ष कार्यक्रम घोषणा गरेको छ।
बस्नेतका अनुसार मंसिर १० गतेदेखि देशव्यापी रूपमा धरना, विरोधसभा, जनजागरण कार्यक्रम, र आवश्यकता अनुसार आन्दोलनका थप चरणहरू सञ्चालन गरिने छ।

जसपा नेपालले अहिलेको राजनीतिक, सामाजिक र आर्थिक अनिश्चितताबाट देशलाई निकास दिन आफ्नो २८ बुँदे धारणा निर्णायक मोड बन्न सक्ने दाबी गरेको छ।