फ्रान्समा विद्यालयको अवस्था र महँगीविरुद्धको प्रदर्शन हिंसात्मक, १,२०० भन्दा बढी पक्राउ

काठमाडौं । फ्रान्समा विद्यालयको कमजोर अवस्था, कर्मचारी अभाव र बढ्दो महँगीविरुद्ध शनिबार भएको प्रदर्शन हिंसात्मक बनेको छ। प्रदर्शनका क्रममा कम्तीमा १,२०० जना पक्राउ परेका छन् भने १५० जना प्रहरी घाइते भएका छन्।

फ्रान्सेली सरकारका अनुसार देशभर करिब ५ लाख ५० हजार मानिस प्रदर्शनमा सहभागी भएका थिए। राजधानी पेरिससहित विभिन्न सहरमा आगजनी, तोडफोड र लुटपाटका घटना भएका छन्।

पेरिसमा साँझसम्म प्रदर्शनकारी र दंगा नियन्त्रणमा खटिएका प्रहरीबीच झडप भएको थियो। भीड नियन्त्रण गर्न प्रहरीले अश्रुग्यास र पानीको फोहोरा प्रयोग गरेको थियो। राजधानीसहित विभिन्न स्थानमा भवन र सवारीसाधनमा आगजनी गरिएको छ।

लिमोज सहरको नगर भवनमा लागेको आगोका कारण छानाको केही भाग भत्किएको स्थानीय अधिकारीहरूले बताएका छन्। लियोनमा पर्यटकीय सूचना केन्द्रमा पनि आगजनी भएको छ। लियोनका मेयर ग्रेगोरी डुसेले घटनालाई सहरका लागि दुःखद क्षति भन्दै ऐतिहासिक तथा प्रसिद्ध भवनमा आगजनी हुनु गम्भीर विषय भएको फ्रान्सेली सञ्चारमाध्यम बीएफएम टीभीलाई बताएका छन्।

स्थानीय प्रहरीले आगो निभाउन पुगेका अग्निनियन्त्रकलाई केही व्यक्तिले सुरक्षित रूपमा काम गर्न नदिएको जनाएको छ। दक्षिणपूर्वी सहर सेन्ट-इटियनका मेयर रेजिस जुआनिकोका अनुसार प्रदर्शनका क्रममा ग्रिनेड विस्फोट हुँदा एक युवकको हात चुँडिएको थियो। “यस्तो दुःखद घटना कहिल्यै हुनु हुँदैनथ्यो,” उनले सामाजिक सञ्जालमा लेखेका छन्।

विभिन्न सहरमा आगजनी र तोडफोड

फ्रान्सको आन्तरिक मन्त्रालयले पेरिस, मार्से, रेनेस, टुलुज र आन्जेसहित विभिन्न सहरमा मुख छोपेका व्यक्तिहरूले लक्षित हिंसात्मक गतिविधि गरेको जनाएको छ। ग्रेनोबल, एभिन्योन, पाउ, मोन्टपेलियर र भालेन्समा पनि भवनमा क्षति पुगेको खबर छ।

पेरिसमा कपडा तथा खाद्यान्न पसलहरूमा लुटपाट भएको छ। लिले सहरमा एप्पलको एउटा पसल तोडफोड गरी सामान लुटिएको छ। प्लास द ला रिपब्लिकजस्ता प्रसिद्ध स्थानमा पनि सवारीसाधन जलाइएको थियो।

बीबीसीका अनुसार पेरिसमा दिउँसो सुरु भएको मुख्य जुलुस सुरुमा शान्तिपूर्ण थियो। प्रदर्शनकारीमध्ये केही युवाले आफूहरू शान्तिपूर्ण परिवर्तनको पक्षमा रहेको बताएका थिए। तर साँझ पर्दै जाँदा केही समूहले सडकमा आगो लगाउने, गाडी जलाउने र पसल तोडफोड गर्ने गतिविधि गरेका थिए।