अख्तियारद्वारा सर्लाहीमा ७ लाख ५० हजार घुससहित डिभिजन प्रमुख र अधिकृत पक्राउ

सर्लाही — अख्तियार दुरुपयोग अनुसन्धान आयोगले सर्लाहीको भूमिगत जलश्रोत तथा सिँचाइ विकास डिभिजन कार्यालयका डिभिजन प्रमुख र एक मेकानिकल अधिकृतलाई घुससहित रंगेहात पक्राउ गरेको छ। पक्राउ पर्नेहरूमा डिभिजन प्रमुख अनुपमा ढकाल र मेकानिकल अधिकृत तुलाकान्त चौधरी रहेका छन्। उनीहरूलाई आयोगको बर्दिबासबाट खटिएको टोलीले साउन ८ गते नियन्त्रणमा लिएको हो।

अख्तियारका अनुसार, बोरिङ र मोटर जडान गर्ने कार्य सम्पन्न भएपछि सो कार्यको भुक्तानी दिने क्रममा सेवाग्राहीसँग घुस माग गरिएको थियो। “काम सम्पन्न भएपछि रकम भुक्तानीका लागि दुःख हैरानी दिई घुस/रिसवत माग गरिरहेको” भन्ने सूचना र उजुरीका आधारमा अख्तियारको टोलीले उनीहरूलाई पछ्याएको थियो।

टोलीले डिभिजन प्रमुख ढकाल र अधिकृत चौधरीलाई सेवाग्राहीबाट ७ लाख ५० हजार रुपैयाँ घुस लिइसकेको अवस्थामा बागमती नगरपालिका वडा नं. १२ स्थित डिभिजन प्रमुखको क्वार्टरबाट नियन्त्रणमा लिएको हो। खानतलासीका क्रममा उनीहरूको साथबाट घुसबापतको साढे ७ लाख रुपैयाँका साथै स्रोत नखुलेको थप ७१ हजार ११५ रुपैयाँ र ३ थान मोबाइल फोनसमेत बरामद गरिएको छ।

अख्तियारका प्रवक्ता सुरेश न्यौपानेले यस सम्बन्धमा थप अनुसन्धान भइरहेको जानकारी दिएका छन्। पक्राउ परेकामाथि थप कानुनी कारवाही अघि बढाउने तयारी भइरहेको अख्तियारले जनाएको छ। यस घटनाले भ्रष्टाचारविरुद्धको अभियानलाई थप बलियो बनाउने उद्देश्य राखिएको छ।