भारतले नेपाललाई बाढीपहिरो प्रभावित क्षेत्रमा थप सहायता र प्राविधिक टोली नेपाल आइपुग्यो

काठमाडौं । नेपालमा बाढी र पहिरोका कारण उत्पन्न भएको विपद् व्यवस्थापनमा भारतले थप सहयोग पुर्‍याएको छ। भारतीय सरकारले नेपाललाई राहत र उद्धारका लागि ११ टन राहत सामग्री र प्राविधिक टोलीसहितको चौथो विमान पठाएको जानकारी दिएको छ। यस कदमले नेपालका बाढीपहिरो प्रभावित क्षेत्रहरूमा खोजी, उद्धार र राहत कार्यमा थप बल पुर्‍याउने आशा गरिएको छ।

भारतीय विदेशमन्त्री डा. एस. जयशंकरले आइतबार बिहान सामाजिक सञ्जालमार्फत नेपालको सहायता र उद्धार प्रयासहरूमा भारतको निरन्तर साथ र सहयोग रहने प्रतिबद्धता व्यक्त गरेका छन्। उनले भने, “नेपालको संकटमा भारतको साथ सदैव रहनेछ।”

काठमाडौंस्थित भारतीय दूतावासले जनाएको अनुसार, भारतीय वायुसेनाको सी-१३० विमानमार्फत विपद् व्यवस्थापन र उद्धारका लागि आवश्यक उपकरणसहितको प्राविधिक टोली नेपाल आएको छ। यस टोलीमा खोजी र उद्धार गर्न आवश्यक टनेल (सुरुङ) प्राविधिकहरू र डीएनए विश्लेषण गर्नका लागि आवश्यक उपकरणसहितको फरेन्सिक विशेषज्ञहरूको टोली समावेश छ। यसले बाढीपहिरो प्रभावित क्षेत्रमा राहत र उद्धार कार्यलाई तीव्रता दिने अपेक्षा छ।

राहत सामग्रीको रुपमा ब्ल्याङ्केट, स्लिपिङ ब्याग, त्रिपाल, प्लास्टिकका सिट, सरसफाइका सामग्री लगायतका सामग्री पनि नेपाल ल्याइएको छ। यो सहायता भारतले पठाएको चौथो राहतको प्याकेट हो। यसका साथै, सडक र पुलहरूमा भएको क्षतिप्रति ध्यान दिएर भारतले संरचनागत सहयोगको रूपमा १६ वटा ट्रकमा लामो सिंगल लेन मोड्युलर स्टिल ब्रिजका उपकरणहरू पठाएको छ। थप ७ वटा बेली ब्रिजका उपकरण र प्राविधिक टोलीहरू पनि छिट्टै नेपाल आउने तयारीमा छन्।

हालसम्म, भारतले नेपाललाई ६८.५ टनभन्दा बढी राहत सामग्री हवाई मार्गबाट काठमाडौँ ल्याएको छ। यसमा अत्यावश्यक औषधि, पोर्टेबल जेनेरेटर, तयारी खानाका प्याकेट, पानी शुद्धीकरणका ट्याब्लेट र अन्य प्राविधिक उपकरणहरू समावेश रहेका छन्। यस सहयोगले नेपालमा बाढीपहिरो पीडितहरूको राहत र पुनःनिर्माणमा ठूलो मद्दत पुग्ने विश्वास गरिएको छ।

यस कदमले नेपाल-भारतबीचको मित्रता र सहयोगको सम्बन्धलाई थप मजबुत बनाएको छ भने, विपद् व्यवस्थापनमा दुबै देशको सहकार्यलाई प्रोत्साहन गरेको छ।