सुनचाँदी पसलमा लुटपाट प्रयत्न: गोली प्रहारमा एक युवा घाइते

बुटवल । दाङको लमही नगरपालिका–५ मा रहेको लमही गल्लीस्थित “जुनतारा सुनचाँदी पसलमा” सोमबार दिउँसो लुटपाट गर्ने उद्देश्यले गोली चलाइएको प्रारम्भिक निष्कर्ष प्रहरीले निकालेको छ।

प्रहरीका अनुसार अज्ञात व्यक्तिहरूले लुटपाट प्रयाससँगै पसलभित्र गोली प्रहार गरेका थिए। उक्त घटनामा पसल सञ्चालक १८ वर्षीय दिपक सुनार घाइते भएका छन्। घाइते सुनारको हाल लमही अस्पतालमा उपचार भइरहेको छ, र उनको स्वास्थ्य अवस्था स्थिर रहेको बताइएको छ।

वडा प्रहरी कार्यालय लमहीका प्रहरी निरीक्षक रोषणराज पाण्डेका अनुसार घटनाको विस्तृत अनुसन्धान सुरु गरिएको छ। “हामी घटनास्थलबाट प्रमाण संकलन गर्दैछौँ, लुटपाट उद्देश्य नै प्रमुख भएको प्रारम्भिक अनुमान छ,” पाण्डेले बताए।

घटनापछि लमही क्षेत्रका स्थानीयवासी त्रसित बनेका छन्। प्रत्यक्षदर्शीहरूले गोली चलेको ठूलो आवाज सुनेपछि स्थानीयहरूले प्रहरीलाई खबर गरेको बताइएको छ। प्रहरीले फरार व्यक्तिहरूको खोजीलाई तीव्रता दिएको छ।