निर्धारित मितिमै निर्वाचन हुन्छ : मन्त्री कुलमान घिसिङ

बेलबारी । ऊर्जा, जलस्रोत तथा सिँचाइ, भौतिक पूर्वाधार तथा यातायात र सहरी विकासमन्त्री कुलमान घिसिङले निर्धारित मितिमै निर्वाचन सम्पन्न हुने विश्वास व्यक्त गरेका छन्। उनले यसमा शङ्का गर्नुपर्ने कुनै आधार नरहेको बताए।

बेलबारी नगरपालिकास्थित आदिवासी जनजाति भवनमा शुक्रबार आयोजित अन्तरक्रिया कार्यक्रममा घिसिङले जेनजी आन्दोलनपछि बनेको अन्तरिम सरकारको मुख्य दायित्व तत्काल समस्या समाधान गर्दै निर्वाचनको वातावरण सुनिश्चित गर्नु रहेको स्पष्ट पारे।

“हामीसँग बजेटको कुनै अभाव छैन। चुनाव गर्न आर्थिक सङ्कट छैन,” उनले भने, “यो सरकारको प्रमुख भूमिका फागुन २१ गतेको निर्वाचन सफलतापूर्वक सम्पन्न गरेर देशलाई स्थायित्व दिनु हो।”

उनका अनुसार राष्ट्र निर्माणको वास्तविक आधार नागरिकको सोच, चरित्र र क्षमतामा निर्भर हुन्छ। राजनीतिक नेतृत्वका विषयमा टिप्पणी गर्दै उनले जोड दिए, “सही समयमा सही व्यक्ति प्रधानमन्त्री नभएसम्म देश चल्दैन। ७५ वर्षको अनुभवले देखायो—केवल राजनीतिक परिवर्तनले मात्र देश बन्दोरहेनछ।”

आगामी निर्वाचनलाई महत्वपूर्ण अवसरका रूपमा चित्रित गर्दै मन्त्री घिसिङले जनतासँग योग्य र सक्षम नेतृत्व छान्न आग्रह गरेका छन्।