राष्ट्रिय सभामा सरकारको कार्यशैलीप्रति सांसदहरूको असन्तुष्टि

काठमाडौं । राष्ट्रिय सभाका सांसदहरूले सरकारको कार्यशैलीप्रति असन्तुष्टि जनाउँदै सुशासन, दैलेखको मिथेन ग्यास उत्खनन, विपद् उद्धार तथा राहत र सडक मर्मतमा तत्काल ध्यान दिन आग्रह गरेका छन्।

सोमबारको बैठकमा शून्य समयमा बोल्दै सांसदहरूले सुशासनको नारा व्यवहारमा नदेखिएको, दैलेखमा ग्यास उत्खनन अघि नबढेको र बाढीपहिरोपीडितले प्रभावकारी राहत तथा उद्धार नपाएको बताएका हुन्।

सांसद विष्णुदेवी पुडासैनीले सडकका खाल्डाखुल्डी पुर्न नसक्दा नागरिकको यात्रा कष्टकर बनेको र असुरक्षित सडकका कारण ज्यान गुमाउनुपर्ने अवस्था आएको बताइन्। उनले सडकको दुरवस्थालाई सुशासनको उपहास भन्दै सरकारको आलोचना गरिन्। बालिका हत्याका अभियुक्तलाई न्यून धरौटीमा रिहा गरिएको विषय पनि न्यायको मर्मविपरीत रहेको उनको भनाइ थियो।

सांसद विष्णुबहादुर विश्वकर्माले दैलेखमा मिथेन ग्यासको भण्डार पुष्टि भइसके पनि उत्खनन प्रक्रिया अघि नबढेकोमा आपत्ति जनाए। राज्यका स्रोतसाधन उपयोग गर्न नसक्नु सरकारको कमजोरी भएको उल्लेख गर्दै उनले ग्यासको अभाव कम गर्न परियोजना तत्काल सञ्चालन गर्न माग गरे।

सांसद सावित्री मल्लले असोजमा परेको अविरल वर्षापछि आएको बाढी, पहिरो र डुबानबाट भएको क्षतिप्रति चिन्ता व्यक्त गरिन्। अन्य सांसदहरूले २१ जनाभन्दा बढीको मृत्यु र सयौँ विस्थापित हुँदा पनि सरकारले उद्धार तथा राहतका लागि विशेष प्याकेज नल्याएको आरोप लगाए। उनीहरूले मृत्यु दर्तासम्बन्धी कानुनी झमेला हटाउन विशेष कानुनी व्यवस्था गर्न पनि माग गरे।

विश्वकर्माले पूर्वप्रधानन्यायाधीश चोलेन्द्रशमशेर जबरालाई पक्राउ गर्दा अपनाइएको प्रक्रियामाथि प्रश्न उठाउँदै लोकतान्त्रिक मूल्य र मान्यताको रक्षा गर्न सरकारलाई सचेत गराए।

बैठकमा सांसदहरूले चाडपर्व नजिकिँदै गर्दा भत्किएका सडक र पुलको तत्काल मर्मत गर्नुपर्नेमा पनि जोड दिएका थिए।