सप्तरीमा भारतबाट भन्सार छली गरी ल्याइएको सामान र मोटरसाइकल बरामद

सप्तरी । सप्तरीको बोदेबरसाइनमा भारतबाट भन्सार छली गरी ल्याइएको सामान र मोटरसाइकल बरामद भएको घटनालाई लिएर प्रहरी र स्थानीय बिच मतभिन्नता देखिएको छ। घटनाको वास्तविक विवरण र प्रहरीको मुचुल्का तयार गर्ने तरिका प्रति स्थानीयले प्रश्न उठाएका छन्।

गत १८ गते दिउँसो करिब ३:३० बजे भारतबाट छली गरी ल्याइएको सामानसहित एक व्यक्तिलाई स्थानीयले नियन्त्रणमा लिएर इलाका प्रहरी कार्यालय बोदेबरसाइनमा बुझाएको स्थानीयको दाबी छ। तर प्रहरीको विवरणअनुसार, उक्त घटना राति १२:३० बजे शिवचोकबाट भएको र मोबाइलसहितको सामानसहित मोटरसाइकल बरामद भएको हो।

जिल्ला प्रहरी कार्यालय सप्तरीले २१ गते जारी गरेको विज्ञप्ति अनुसार, प्रहरी टोलीलाई देख्नेबित्तिकै तस्करहरूले मोटरसाइकल र बोरा छोडेर फरार भएका थिए। जाँचताका विभिन्न मोबाइल र मोबाइलका सामान फेला परेको थियो। प्रहरीले अनुमान गरेअनुसार, बरामद सामानको मूल्य करिब ३ लाख १२ हजार ३ सय रुपैयाँ रहेको छ।

तर स्थानीयवासीले भने, पक्राउ परेका व्यक्तिलाई प्रहरी कार्यालयबाटै छाडिएको र घटनालाई झुटो विवरणले ढाक्ने प्रयास भएको आरोप लगाएका छन्। उनीहरूका अनुसार, घटना दिउँसो भएको भए पनि प्रहरीले रातको समयमा भएको भनेर जानकारी सार्वजनिक गरेको छ।

स्थानीयले भने, “यसरी झुटो विवरण दिएर सर्वसाधारणलाई भ्रममा पार्न मिल्दैन। हामी निष्पक्ष छानबिनको माग गर्दछौं।” भनेका छन्। यसबारे इलाका प्रहरी कार्यालय बोदेबरसाइनका प्रमुख प्रहरी नायव निरीक्षक शिवशंकर शर्माले आरोपहरू असत्य भएको दाबी गरे।

जिल्ला प्रहरी कार्यालय सप्तरीका प्रहरी उपरीक्षक रूपक खड्काले भने, “सामान बेवारिसे अवस्थामा फेला परेको हो, यदि कुनै व्यक्तिलाई पक्राउ गरी छोडिएको भए भने फेरि कारबाही गर्नेछौं।”

यसैबीच, तस्करीमा संलग्न भएको आरोप लागेका व्यक्तिहरूले आफूहरूलाई प्रहरीले पक्राउ गरेर छोडेको र मासिक रकम बुझाउँदै आएको आरोप लगाएका छन्। तर, ती आरोपहरूको स्वतन्त्र पुष्टि हुन सकेको छैन। यस घटनामा प्रहरी र स्थानीय बिच देखिएको अन्तरतालिका र विवरणको विश्वसनीयता सुनिश्चित गर्न निष्पक्ष छानबिन आवश्यक देखिएको छ।