सुरक्षा थ्रेट रहेको भन्दै पूर्वप्रधानन्यायाधीश चोलेन्द्र शम्शेर जबरा टेकुमा

काठमाडौं । अपराध अनुसन्धान कार्यालय टेकुका प्रमुख एसएसपी सन्तोष खड्काले सुरक्षा थ्रेट रहेको जानकारीपछि पूर्वप्रधानन्यायाधीश चोलेन्द्रशमशेर जबरालाई कार्यालयमा ल्याइएको बताएका छन्।

खड्काले आज बिहान अनलाइनखबरसँग कुरा गर्दै जबरालाई राति कार्यालयमा ल्याइएको पुष्टि गरेका हुन्। उनका अनुसार सम्भावित सुरक्षा जोखिमलाई ध्यानमा राखेर जबरालाई महाराजगञ्जस्थित निवासबाट टेकु ल्याइएको हो।

‘उहाँलाई सुरक्षा थ्रेट छ भन्ने थाहा पाएपछि राति नै केही हुन सक्छ भनेर हाम्रो कार्यालयमा ल्याएर राखेका हौँ,’ खड्काले भने। तर, जबरालाई नियन्त्रणमा लिनुअघि प्रहरीले कुनै अदालतबाट पक्राउ पुर्जी नलिएको सम्बद्ध स्रोतले जनाएको छ।

प्रहरी लिन आएपछि जबराले आफ्ना भाइ प्रभुशमशेरलाई फोन गरेर जानकारी गराएका थिए। प्रभुशमशेरले पनि आज बिहान अनलाइनखबरसँग कुरा गर्दै प्रहरीले ‘जेनजीहरूबाट तपाईंलाई थ्रेट छ’ भन्दै दाइलाई लगेको बताए।

प्रभुशमशेरका अनुसार जबरा अहिले अपराध अनुसन्धान कार्यालय टेकुमा छन्। उनीनिकट स्रोतले प्रहरीले कसैलाई भेट्न नदिएको बताएको छ। जबरालाई भेट्न उनका छोरा अहिले टेकु पुगेका छन्।