रौतहटको गौर–चन्द्रपुर सडकखण्डमा तीन सवारी ठोक्किँदा ७ घाइते

रौतहट । रौतहटको गौर–चन्द्रपुर सडकखण्डअन्तर्गत यमुनामाई गाउँपालिका–४ मा आज बिहान करिब ८:३० बजे तीन वटा सवारीसाधन आपसमा ठोक्किँदा सात जना घाइते भएका छन्। दुर्घटनामा स्थानीय विजय साहको होटलसमेत ठूलो क्षति पुगेको प्रहरीले जनाएको छ।

जिल्ला प्रहरी कार्यालय रौतहटका प्रवक्ता डीएसपी विष्णु प्रदीप बस्यालका अनुसार बडहरवाबाट आउँदै गरेको एचआर–२८–डी–७२२२ नम्बरको स्कार्पियोले चपुरबाट गौरतर्फ गइरहेका विआर–०७–पिए–७५८४ नम्बरका अर्को स्कार्पियो र बाटोमै पार्क गरिएको ना.२ह–६५२५ नम्बरको अटो रिक्सा एकैपटक ठक्कर दिँदा दुर्घटना भएको हो।

दुर्घटनामा घाइते हुनेहरूमा

• बारा आदर्शकोतवाल–७ का ३० वर्षीय पवन यादव,

• सर्लाही बरहथवा–१४ का ११ वर्षीय अंकित महतो,

• गौर–२ का २४ वर्षीय स्कार्पियो चालक सुरेन्द्र कुमार साह,

• राजदेवी–८ का ५० वर्षीय शिवजी साह,

• मुनामाई–५ का ३९ वर्षीय मंगल पटेल,

• राजपुर–३ का १० वर्षीय तारिक वस्ता लगायत एक अन्य व्यक्ति रहेका छन्।

प्रहरीका अनुसार दुर्घटनापछि टोली तत्कालै घटनास्थल पुगेको र तीनै सवारीसाधन नियन्त्रणमा लिएर विस्तृत अनुसन्धान सुरु गरिएको छ। घाइते सबैजनालाई उपचारका लागि प्रादेशिक अस्पताल गौरमा भर्ना गरिएको प्रहरीले जनाएको छ।