काठमाडौँ उपत्यकाबाट चोरी भएका १४ हाते ट्याक्टरसहित पाँच जना पक्राउ

काठमाडौँ । काठमाडौँ उपत्यकाका विभिन्न स्थानबाट हाते ट्याक्टर (पावर टिलर) चोरी गर्ने तथा खरिद–बिक्रीमा संलग्न रहेको आरोपमा प्रहरीले पाँच जनालाई पक्राउ गरेको छ। उनीहरूको साथबाट चोरी भएका १४ थान हाते ट्याक्टर र बा ३१ प २१५९ नम्बरको मोटरसाइकल बरामद गरिएको प्रहरीले जनाएको छ।

स्वयम्भू क्षेत्रबाट हाते ट्याक्टर चोरी भएको सूचना पाएपछि प्रहरी वृत्त स्वयम्भूको टोलीले खोजतलास सुरु गरेको थियो। त्यस क्रममा असोज ८ गते भक्तपुरको मध्यपुर थिमि नगरपालिका–९ बाट उनीहरूलाई पक्राउ गरिएको प्रहरीले जनाएको छ।

पक्राउ पर्नेमा भक्तपुरको चाँगुनारायण नगरपालिका–५ का ४१ वर्षीय राजु मचामसी, २१ वर्षीय राजेश मचामसी र १९ वर्षीय राजन मचामसी छन्। यस्तै, रौतहटको परोहा नगरपालिका–५ घर भई भक्तपुरको बोडेमा कवाड व्यवसाय सञ्चालन गर्ने ३५ वर्षीय राजेश्वर जैसवाल र काभ्रेको पाँचखाल नगरपालिका–४ घर भई कवाड व्यवसाय सञ्चालन गर्ने ४८ वर्षीय विपिनकुमार शाही पनि पक्राउ परेका छन्।

चोरीसम्बन्धी कसुरमा अनुसन्धान गर्न काठमाडौँ जिल्ला अदालतबाट पाँच दिनको म्याद थप अनुमति लिइएको छ। घटनाबारे प्रहरी वृत्त स्वयम्भूले थप अनुसन्धान गरिरहेको छ।