अफगानिस्तानमा पाकिस्तानको हवाई आक्रमण, ४०० भन्दा बढीको मृत्यु

अफगानिस्तान – अफगानिस्तानको राजधानी काबुलस्थित एक अस्पतालमा पाकिस्तानले गरेको हवाई आक्रमणले ठूलो मानवीय क्षति पुगेको छ। अफगानिस्तानले सार्वजनिक गरेको जानकारी अनुसार, यस आक्रमणमा कम्तीमा ४०० जनाको मृत्यु भएको छ। यो अस्पतालले लागुऔषध प्रयोगकर्ताहरूको उपचार गर्दै आएको थियो। पाकिस्तानले यस आक्रमणको आरोपलाई अस्वीकार गर्दै, आफ्नो पक्षबाट कुनै गैरसैनिक क्षेत्रलाई लक्षित नगरेको दाबी गरेको छ।

अफगानिस्तानका उपसरकारी प्रवक्ता हमदुल्लाह फितरतले सामाजिक सञ्जाल एक्समा पोस्ट गर्दै राति करिब ९ बजे उक्त अस्पतालमा हवाई आक्रमण भएको जानकारी दिएका छन्। उनले भने, “आक्रमणले २,००० शय्या क्षमताको अस्पतालको ठूलो भाग नष्ट गरेको छ। हालसम्म मृत्यु हुनेको संख्या ४०० पुगेको छ भने करिब २५० जना घाइते भएका छन्।”

स्थानीय टेलिभिजन र सामाजिक सञ्जालमा पोस्ट गरिएका भिडियो फुटेजहरूमा देखाइएअनुसार, सुरक्षाकर्मीहरूले टर्चलाइटको मद्दतले घाइतेहरूलाई उद्धार गरिरहेका देखिन्छन्। आगो नियन्त्रण गर्न र भग्नावशेषमा फसेका शवहरू निकाल्न उद्धारकर्मी संघर्ष गरिरहेका छन्। फितरतका अनुसार, उद्धार टोलीहरूले आगो नियन्त्रण गर्न र घाइतेहरूको उद्धार कार्य जारी राखेका छन्।

यो घटना दुई छिमेकी देशबीचको हिंसात्मक संघर्षको तेस्रो हप्तामा प्रवेश गरेको समयमा भएको हो। आक्रमण हुनुअघि केही घण्टा मात्र पहिले, साझा सीमामा गोली हानाहान भएको थियो जसमा अफगानिस्तानतर्फ चारजना ज्यान गएको थियो।

अफगान सरकारले यस घटनाको कडा शब्दमा निन्दा गर्दै पाकिस्तानलाई ‘आतंक मच्चाउन अस्पताल र नागरिक स्थलहरूलाई लक्षित गरेको’ आरोप लगाएको छ। यस घटनाले क्षेत्रीय स्थिरता र मानवीय स्थिति माथि गम्भीर असर पुर्‍याएको छ।