मधेस प्रदेशमा हाजिर–जवाफ प्रतियोगिताको सफल समापन: विद्यार्थीको ज्ञान, नेतृत्व र आत्मविश्वास प्रवर्द्धनमा महत्वपूर्ण कार्यक्रम

राष्ट्रिय निजी तथा आवासीय विद्यालय एसोसिएसन नेपाल (नेशनल प्याब्सन) मधेस प्रदेश समितिद्वारा आयोजित प्रदेशस्तरीय हाजिर–जवाफ प्रतियोगिता २०८२ (चौथो संस्करण) वीरगञ्जको घन्टाघरस्थित क्लासिक बैंक्वेटमा भव्य रुपमा सम्पन्न भएको छ। यस कार्यक्रमको आयोजना विद्यार्थीहरूबीच शैक्षिक प्रतिस्पर्धा र नेतृत्व विकासलाई प्रवर्द्धन गर्न गरिएको हो।

कार्यक्रमको अध्यक्षता नेशनल प्याब्सनका केन्द्रिय उपाध्यक्ष तथा मधेस प्रदेश अध्यक्ष डा. नन्दन यादवले गरेका थिए। कार्यक्रममा प्रमुख अतिथि पूर्व सांसद र राष्ट्रिय स्वाधीनता पार्टीका प्रवक्ता मनिष झाले थिए। उनले यस अवसरमा भने, “यस्ता शैक्षिक प्रतियोगिताले विद्यार्थीको ज्ञान, नेतृत्व र आत्मविश्वासलाई बलियो बनाउने महत्वपूर्ण भूमिका खेल्छ। आजको प्रतिस्पर्धा केवल अंक र स्थानको लागि नभएर, ज्ञानको प्रकाश फैलाउने यात्राको एउटा महत्वपूर्ण चरण हो। हाम्रा विद्यार्थीहरूमा जाँगर, क्षमता र प्रतिस्पर्धात्मक आत्मविश्वास देख्दा हामी गर्व गर्दछौं। शिक्षा नै समृद्धिको मूल आधार हो, यस्ता कार्यक्रमले भविष्यका नेतृत्वकर्ता उत्पादन गर्न मद्दत गर्दछ।”

अतिथिहरूले विद्यालय, शिक्षक र अभिभावकलाई यस्ता कार्यक्रमलाई निरन्तरता दिन आग्रह गरे। कार्यक्रमका विशिष्ट अतिथिहरूमा नेशनल प्याब्सनका पूर्व राष्ट्रिय अध्यक्ष पाण्डव हमाल, केन्द्रिय वरिष्ठ उपाध्यक्ष बजेन्द्र मिश्र, केन्द्रिय सदस्यहरू छेदुप लामा, राम बाबु सिंह, मोतिबुल राईन, राजु कार्की, प्रदेश उपाध्यक्षहरू लालजी ठाकुर र पप्पु गुप्ता रहेका थिए। साथै, प्रदेश सचिव जितेन्द्र प्रसाद गुप्ता, कोषाध्यक्ष राम यस झा, सह–सचिव के एस फिगिसन, प्रदेश सदस्यहरू कौशलेन्द्र कुमार, विजय यादव, पर्सा जिल्ला समितिका अध्यक्ष रामकुमार श्रेष्ठ, महानगर समितिका नगर अध्यक्ष सोनालाल पटेल, लालबहादुर गुरुङ लगायतको उपस्थिति रहेको थियो।

मधेस प्रदेशका ८ जिल्ला—पर्सा, बारा, रौतहट, सप्तरी, सर्लाही, धनुषा, महोत्तरी र सिरहाबाट छानिएका विद्यार्थीहरूले प्रतियोगितामा भाग लिएका थिए। प्रतिस्पर्धाको परिणामस्वरूप सप्तरी जिल्ला प्रथम, महोत्तरी दोस्रो र धनुषा तृतीय स्थानमा पुगेका छन्। विजेतालाई ट्रफी, मेडल र प्रमाणपत्र प्रदान गरी सम्मानित गरिएको थियो।

कार्यक्रमका वक्ताहरूले हाजिर–जवाफ जस्ता शैक्षिक गतिविधिहरूले विद्यार्थीहरूमा विश्लेषण क्षमता, प्रस्तुतीकरण सीप, तर्कशक्ति र ज्ञानवृद्धिमा महत्वपूर्ण योगदान पुर्याउने बताएका थिए। यस कार्यक्रमले विद्यार्थीहरूलाई मात्र होइन, सम्पूर्ण विद्यालय र अभिभावकहरूलाई पनि शिक्षामा रुचि र प्रतिस्पर्धात्मकता बढाउन प्रेरित गरेको छ। यस प्रकारका कार्यक्रमहरूले विद्यार्थीहरूको सर्वांगीण विकासमा टेवा पुर्याउने विश्वास व्यक्त गरिएको छ।