नेपाल प्रिमियर लिगको दोस्रो संस्करणको लागि एक्सपर्ट एजुकेशनको एजुकेशनल कन्सलटेन्सी पार्टनरको रूपमा सहकार्य

बहुप्रतिक्षित दोस्रो संस्करणको नेपाल प्रिमियर लिग (एनपीएल) का लागि नयाँ अध्याय थपिएको छ। नेपालको अग्रणी शैक्षिक परामर्शदाता संस्था एक्सपर्ट एजुकेशन एण्ड भिसा सर्भिसेजले यस पटकको एनपीएलको एजुकेशनल कन्सलटेन्सी पार्टनरको रूपमा सहकार्य गरेको हो। यस सम्बन्धमा नेपाल क्रिकेट संघ (क्यान) र एक्सपर्ट एजुकेशनबीच एक औपचारिक सम्झौता पत्रमा हस्ताक्षर गरिएको छ, जसले यस पटकको प्रतियोगितालाई अझै बढी प्रभावकारी र व्यावसायिक बनाउने लक्ष्य राखेको छ।

प्रेस विज्ञप्ती जारी गर्दै एक्सपर्ट एजुकेशनले यस प्रायोजन सम्झौता सम्बन्धी जानकारी प्रदान गरेको छ। यस अनुसार, एक्सपर्ट एजुकेशनले अष्ट्रेलिया, बेलायत, क्यानडा, अमेरिका, न्यूजील्याण्ड लगायत विश्वका विभिन्न देशहरूमा अध्ययन गर्न चाहने नेपाली विद्यार्थीहरूलाई परामर्श सेवा प्रदान गर्दै आएको छ। साथै, विश्वभरका २५ देशमा आफ्ना करिब ९० शाखाहरू मार्फत सेवाहरू विस्तार गर्न सफल भएको छ।

एक्सपर्ट एजुकेशनले लामो समयदेखि विभिन्न क्रिकेट प्रतियोगिताहरूमा सक्रिय भूमिका निर्वाह गर्दै आएको छ। यसले कलेज प्रिमियर लिग, स्कुल प्रिमियर लिग, प्रधानमन्त्री कप, एभरेस्ट प्रिमियर लिग र जुनियर राष्ट्रिय खेलकुद च्याम्पियनसिप जस्ता मुख्य प्रतियोगिताहरूमा प्रायोजन गरेको छ। अन्तर्राष्ट्रिय स्तरमा पनि यसको सक्रियता देखिन्छ, जसमध्ये अष्ट्रेलियामा कम्युनिटी कप र मेलबर्नस्थित एक्सपर्ट सगरमाथा लिगमा सहकार्य गरेको छ। त्यस्तै, नाइस नेपाली क्रिकेट क्लब ब्रिसवेनलाई समेत प्रायोजन गरेको छ। यसैगरी, पोखरा प्रिमियर लिगमा एक्सपर्ट धनगढी क्रिकेट टोलीको स्वामित्व लिएको थियो।

क्रिकेटको प्रगति र प्रचार-प्रसारका लागि एक्सपर्टले चितवनका विभिन्न खेलकुद कार्यक्रमहरूमा पनि सक्रिय भागीदारी रहेको छ। भरतपुर मेयर कप अन्तरविद्यालय क्रिकेट र विभिन्न फुटबल प्रतियोगिताहरूमा समेत यसले प्रायोजन गर्दै आएको छ। यसले खेलकुद क्षेत्रलाई थप प्रोत्साहन र समर्थन प्रदान गर्दै आएको छ।

यस सहकार्यलाई अझ मजबुत बनाउन नेपाली राष्ट्रिय क्रिकेट टोलीका पूर्व कप्तान तथा वर्तमान नेपाल क्रिकेट संघका सचिव पारस खड्का समेत यस अभियानमा सक्रिय छन्। विगत सात वर्षदेखि उनी एक्सपर्ट एजुकेशनको ब्रान्ड एम्बेसडरको रूपमा कार्यरत रहेका छन्। यसले शैक्षिक परामर्श र खेलकुद क्षेत्रमा रहेको यस संस्थाको प्रभावकारिता अझ बढाएको छ।

एनपीएलको दोस्रो संस्करण मंसिर १ गतेदेखि टियु अन्तर्राष्ट्रिय क्रिकेट रंगशालामा सुरु हुने तयारी छ। यस पटकको प्रतियोगितामा रात्रीकालिन खेलहरू आयोजना गरिने योजना रहेको छ। प्रतियोगितामा कुल ८ वटा फ्रेन्चाइज टोलीहरू सहभागी हुने भएका छन्। पहिलो संस्करणको उपाधि जनकपुर बोल्ट्सले जितेको थियो। यस पटकको लिगले नेपाली युवाहरुलाई खेलकुद र शिक्षाको दुबै क्षेत्रमा प्रेरित गर्ने उद्देश्य राखेको छ।

यस प्रकार, एक्सपर्ट एजुकेशन र नेपाल क्रिकेट संघबीचको सहकार्यले नेपाली क्रिकेटको स्तरलाई उकास्न र युवाहरूलाई प्रेरित गर्न महत्वपूर्ण भूमिका खेल्ने विश्वास गरिएको छ।