छठपर्व मनाउन काठमाडौँ महानगरपालिकाले तोकेको आठ स्थान; सरसफाइ र व्यवस्थापनमा तयारी पूरा।

काठमाडौँ – काठमाडौँ महानगरपालिकाले यस वर्षको छठ पर्व मनाउनका लागि महानगरभित्र आठ वटा स्थान तोकेको छ। महानगर प्रहरी प्रमुख राजुनाथ पाण्डेले शनिवार आयोजित पत्रकार सम्मेलनमा यो जानकारी दिएका हुन्।

उनका अनुसार, कमलपोखरी, गौरीघाट, बोक्सीदह, बागमती दोभन, टंकेश्वर, बल्खु कुमारी क्लब अगाडि, कुलेश्वर भलिबल ग्राउण्ड र रामघाटमा छठ पर्व मनाउनका लागि स्थान तोकिएको छ।

प्रहरी प्रमुख पाण्डेले भने, “महानगरले तोकिएका स्थानहरूमा सरसफाइको काम सुरु गरिसकेको छ। ३ सयभन्दा बढी सरसफाइकर्मीहरू खटिएका छन्। हाम्रो लक्ष्य छठ पर्वलाई व्यवस्थित रूपमा मनाउन कुनै कमी नहुने व्यवस्था मिलाउने हो।”

उनले थपे, “ताल पोखरीमा पैसा उठाउन नपाइने र यदि कसैले शुल्क लिन खोजे भने जानकारी गराउन आग्रह गर्दछु। साथै, तोकिएको ठाउँमा सवारी पार्किङ नगर्न पनि अनुरोध गर्दछु।”

यस वर्ष कार्तिक १० गते छठ पर्व मनाइँदैछ। महानगरले सबैलाई स्वच्छ र सुरक्षित वातावरणमा छठ पर्व मनाउन आग्रह गरेको छ।