इजरायलमा केयरगिभरको जागिर लगाइदिने भन्दै २ करोड ५० लाखभन्दा बढी ठगी

काठमाडौं । इजरायलमा केयरगिभरको रोजगारी दिलाइदिने प्रलोभन देखाएर करोडौँ रुपैयाँ ठगी गरेको आरोपमा नेपाल प्रहरीको केन्द्रीय अनुसन्धान ब्यूरो (सीआईबी) ले पक्राउ परेका चार जनामाथि अनुसन्धान अघि बढाएको छ। ब्यूरोले ठगीमा परेका अन्य व्यक्तिलाई पनि सम्पर्कमा आएर जाहेरी दर्ता गर्न आग्रह गरेको छ।

प्रधानमन्त्री तथा मन्त्रिपरिषद्को कार्यालयअन्तर्गतको हेलो सरकार शाखा र पीडितहरूको उजुरीका आधारमा सीआईबीले रामेछापको सुनापती गाउँपालिका–१ का ५९ वर्षीय भरतप्रसाद चौलागाईंसहित चार जनालाई पक्राउ गरेको हो। उनीहरूमाथि मुलुकी अपराध संहिता, २०७४ अन्तर्गत ठगी तथा आपराधिक विश्वासघात र संगठित अपराध निवारण ऐन, २०७० अन्तर्गतको कसुरमा अनुसन्धान भइरहेको ब्यूरोले बुधबार जनाएको छ।

सीआईबीका अनुसार नेपाल र इजरायल सरकारबीचको ‘जीटुजी’ सम्झौताअन्तर्गत सन् २०२४ मा सञ्चालित केयरगिभर परीक्षामा उत्तीर्ण भई प्रतीक्षा सूचीमा रहेका परीक्षार्थीलाई आरोपित समूहले निशाना बनाएको थियो। परीक्षामा उत्तीर्ण ३ हजार ४६१ जनामध्ये १ हजार १५२ जना प्रतीक्षा सूचीमा थिए। तीमध्ये पहिलो चरणमा १५६ जनालाई मन्त्रिपरिषद्बाट विशेष निर्णय गराएर तत्काल इजरायल पठाइदिने भन्दै समूहले झुटो आश्वासन दिएको अनुसन्धानबाट खुलेको सीआईबीले जनाएको छ।

आफूहरूको प्रधानमन्त्रीका प्रमुख सल्लाहकारसँग प्रत्यक्ष चिनजान रहेको दाबी गर्दै आरोपितहरूले प्रधानमन्त्री तथा मन्त्रिपरिषद्को कार्यालयका नाममा नक्कली कागजातसमेत तयार पारी देखाएको ब्यूरोको भनाइ छ। वैदेशिक रोजगारीको चाहना र अन्योलमा रहेका युवाको बाध्यताको फाइदा उठाएर उनीहरूले हालसम्म पीडितबाट २ करोड ५० लाख रुपैयाँभन्दा बढी रकम असुलेको प्रारम्भिक अनुसन्धानमा खुलेको छ।

पक्राउ परेका चारै जनालाई काठमाडौं जिल्ला अदालतबाट म्याद थप गरी हिरासतमा राखिएको छ। आरोपितहरूको प्रलोभन वा भ्रममा परी ठगीमा परेका अन्य व्यक्तिलाई यथाशीघ्र सीआईबीमा उपस्थित भई जाहेरी दरखास्त दिन ब्यूरोले अनुरोध गरेको छ।