सर्वदलीय बैठकले सद्भाव र संयम अपनाउने संयुक्त विज्ञप्ति जारी गर्ने निर्णय

काठमाडौँ — सत्तारुढ दल रास्वपा सभापति रवि लामिछानेले आह्वान गरेको सर्वदलीय बैठकले देशमा शान्ति र स्थिरता कायम राख्न सद्भाव र संयम अपनाउने संयुक्त विज्ञप्ति जारी गर्ने निर्णय गरेको छ। बैठकपछि सार्वजनिक गरिएको विज्ञप्तिमा सबै दलहरूले एकमत भएर राष्ट्रिय एकता र शान्ति कायम राख्नुपर्नेमा जोड दिएका छन्।

बैठकपछि कांग्रेस संसदीय दलका नेता भीष्मराज आङ्देम्बेले सुनसरी लगायतका स्थानहरूमा भड्किएको हिंसाचार र तनावको अवस्थालाई नियन्त्रण गर्न सबै दलले एकजुट भएर काम गर्नुपर्नेमा जोड दिए। उनले भने, “शान्ति कायम गर्न र परिस्थिति सामान्य बनाउने लागि हामी सबैले संयुक्त विज्ञप्ति जारी गर्ने सहमति गरेका छौं।”

सर्वदलीय बैठकमा दलका नेताहरूले यस्तो संवेदनशील विषयमा प्रधानमन्त्री र गृहमन्त्रीको अनुपस्थितिले थप जटिलता सिर्जना भएको भन्दै सरकारलाई जिम्मेवार भएर प्रस्तुत हुन आग्रह गरेका छन्। नेता आङ्देम्बेले भने, “यस्ता गम्भीर विषयहरूमा प्रधानमन्त्रीले राष्ट्रपतिसँग पनि छलफल गर्नुपर्ने हो, तर त्यसतर्फ ध्यान नदिइएको महसुस भएको छ।”

नेकपा एमालेका महासचिव शंकर पोखरेलले बताउनुभयो, “रास्वपा सभापति लामिछानेले बोलाएको यस बैठकमा सुनसरी लगायतका क्षेत्रमा देखिएको तनावको अवस्थालाई सामान्य बनाउने विषयमा गम्भीर छलफल भयो। साथै, भीड नियन्त्रण गर्न सरकार किन असफल भइरहेको भन्ने कुरामा दलका नेताहरूले चासो व्यक्त गरे।”

सर्वदलीय बैठकले राष्ट्रिय एकता र स्थिरता कायम गर्न सबै दलहरूलाई संयमित भएर काम गर्न आग्रह गरेको छ भने, आगामी दिनहरूमा शान्ति स्थापनाका लागि थप कदम चालिने अपेक्षा गरिएको छ।