बारामा सुरक्षा जिम्मेवारीमा व्यापक हेरफेर : सिमरा घटनापछि एसपी तामाङलाई आकस्मिक हेडक्वार्टर तानिए

बाराको सिमरा क्षेत्रमा निरन्तर तनाव सिर्जना भएपछि जिल्ला प्रहरी कार्यालय बाराका प्रहरी प्रमुख (एसपी) सन्तोष तामाङलाई प्रहरी प्रधान कार्यालय, नक्साल तानिएको छ। बुधबारदेखि शुरू भएको घटनाको संवेदनशीलता, स्थानीय सुरक्षा अवस्था तथा राजनीतिक तनावलाई व्यवस्थापन गर्न उनलाई तत्काल काठमाडौं झिकाइएको स्रोतहरू बताउँछन्।

यससँगै बारामा खाली भएको नेतृत्व पदमा मानव बेचबिखन अनुसन्धान ब्यूरोमा कार्यरत एसपी नरेन्द्र कुँवरलाई खटाइएको छ। कुन्वरले चाँडै बाराको समग्र सुरक्षा जिम्मेवारी सम्हाल्नेछन्।

यता, धादिङका एसपी भेषराज रिजाललाई मधेश प्रदेश प्रहरी कार्यालयमा पठाइएको छ भने धादिङमै एसपी सुमीत खड्कालाई नयाँ प्रहरी प्रमुखका रूपमा नियुक्त गरिएको छ।

सिमरा क्षेत्रमा अशान्ति : जेनजी अभियानको प्रदर्शनमा आक्रमण

बारामा हालको सुरक्षा संवेदनशीलता बढ्नुका मुख्य कारणमध्ये सिमरामा भएको विवाद प्रमुख रुपमा देखिएको छ। जेनजी अभियानको प्रदर्शनको क्रममा नेकपा एमालेका स्थानीय नेता तथा कार्यकर्ताले आक्रमण गरेको आरोप लागेपछि स्थितिले उग्र रूप लिएको हो।
आक्रमणपश्चात धरपकड, विरोध प्रदर्शन र झडपका घटनाहरू दोहोरिएपछि सिमरा क्षेत्र निरन्तर अशान्त बनेको प्रहरीले जनाएको छ।

यसै घटनापछि स्थानीय प्रशासन र केन्द्रले सुरक्षा व्यवस्थापनलाई थप प्रभावकारी बनाउन नेतृत्व तहमा तात्कालिक सरुवा र फेरबदल गरेको बुझिएको छ।

थप विवरण र प्रतिक्रियाहरू क्रमशः आउँदैछन्।