रास्वपा मधेसकी संस्थापक सभापति ममता शर्माले पार्टीबाट राजीनामा

काठमाडौँ – रास्वपा मधेस प्रदेशकी संस्थापक सभापति र केन्द्रीय महिला तथा सामाजिक विकास विभागकी सदस्य ममता शर्माले पार्टीको कार्यशैलीप्रति असन्तुष्टि जनाउँदै आजैदेखि आफ्नो पार्टीको साधारण सदस्य समेत नरहने गरी राजीनामा पेस गरेकी छन्। उनले पार्टीमा आफ्नो योगदान र विश्वासलाई निराशाजनक रुपमा हेरेको बताउँदै पार्टी परित्याग गरेकी हुन्।

शर्माले आफ्ना राजीनामा पत्रमा भनिन्, “म यस पार्टीमा युवा पुस्तालाई राजनीति सिकाउन र सही मार्गनिर्देशन गर्न आएको थिएँ। तर, आगामी फागुन २१ गतेको निर्वाचनमा पार्टीले अवलम्बन गरेको पद्धति, निर्णय र कार्यशैली मेरो आशा र विश्वासको विपरीत देखियो। यसले मेरो आत्मसम्मान र राजनीतिक मूल्यहरूलाई चोट पुर्‍याएको महसुस गरेको छु।”

उनले थप भनिन्, “संगठनमा दिनरात खटिएका कार्यकर्ताहरूको योगदानको उचित मूल्याङ्कन नभएको, पार्टीका सिद्धान्तहरू व्यवहारमा लागू नभएको र आर्थिक अनियमितताबाट पार्टीका निर्णयहरू प्रभावित भएको देखेर म अब मौन रहन सक्दिनँ। यसकारण, आजैदेखि म पार्टीको साधारण सदस्यबाट पनि अलग हुँदैछु।”

ममता शर्माले रास्वपा मधेसको संस्थापक सभापति रहँदै आएको र यसपालि टिकटको आशामा बसेकी थिइन्। अन्तिम समयमा टिकट नपाएपछि उनी असन्तुष्ट भएकी थिइन्। यसअघि उनले समानुपातिकमा आफ्नो नाम पठाउने निवेदन पनि दिएकी थिइन्, तर पार्टीले उनको नाम सातौं नम्बरमा पुर्‍याएपछि उनले यसमा असहमति जनाउँदै टिकट नलिनु निर्णय गरेकी थिइन्।

शर्माले आफ्नो राजनीतिक जीवनमा पार्टीको मुल्य र सिद्धान्तलाई अत्यन्तै महत्त्व दिँदै आएकी थिइन् र आफ्ना धारणा र मूल्यहरूलाई सम्मान गर्न आग्रह गरेकी छन्। उनको यो कदम पार्टीभित्र र प्रदेशभरि चर्चा का विषय बनेको छ।