सिरहामा अस्थायी पुलको निर्माण, वर्षाका कारण अवरुद्ध सवारी आवागमन पुनः सञ्चालन

सिरहा — बरियारपट्टी गाउँपालिका-५ मा रहेको त्रिशुला खोलामा अस्थायी पुल निर्माण गरी करिब एक सातादेखि अवरुद्ध रहेको सवारी आवागमन पुनः सञ्चालनमा ल्याइएको छ। अविरल वर्षाका कारण खोलाको पानीको सतह बढेपछि सडक सम्पर्क विच्छेद भएको थियो, जसले स्थानीयवासीलाई दैनिक आवतजावत, बिरामीको ओसारपसार र अत्यावश्यक सामग्री ढुवानीमा ठूलो कठिनाइ भएको थियो।

स्थानीय गुनासो र समस्या बुज्दै इलाका प्रहरी कार्यालय महेशपुर पतारबाट प्रहरी निरीक्षक विशाल मल्लको नेतृत्वमा २० जना प्रहरीको टोली घटनास्थलमा खटिएको थियो। प्रहरी टोलीले स्थानीय युवा, समाजसेवी र जनप्रतिनिधिसँग समन्वय गरी उपलब्ध स्रोत-साधनको प्रयोगबाट अस्थायी पुल निर्माण गरेको हो। पुल निर्माण सम्पन्न भएसँगै लामो समयदेखि ठप्प रहेको सवारी आवागमन पुनः सुरु भएको छ।

अस्थायी पुलको सञ्चालनले स्थानीयवासीलाई दैनिक आवतजावत, बिरामीको ओसारपसार र खाद्यान्नजस्ता अत्यावश्यक सामग्रीको ढुवानीमा सहजता भएको छ। यसले स्थानीय जनजीवनमा सकारात्मक प्रभाव पारेको छ।

जिल्ला प्रहरी कार्यालय सिरहाका प्रहरी उपरीक्षक (एसपी) बासुदेव पाठकले करिब एक सातादेखि सडक अवरुद्ध हुँदा स्थानीयको जीवन प्रभावित भएको जानकारी दिए। उनले भने, “प्रहरी, स्थानीय युवा, समाजसेवी र जनप्रतिनिधिको सक्रिय सहकार्यमा कुनै प्राविधिक उपकरण प्रयोग नगरी स्थानीय स्रोत-साधनबाट अस्थायी पुल निर्माण गरी सवारी सञ्चालनमा ल्याएका छौं। विपद्को समयमा नागरिकको सुरक्षा र सहज आवागमन सुनिश्चित गर्नु प्रहरीको प्राथमिक दायित्व हो।”

आगामी दिनमा पनि यस्ता विपद् व्यवस्थापनका कार्यमा प्रहरी सदैव सक्रिय रहने एसपी पाठकले बताए। यस कदमले सिरहाका स्थानीयवासीको जीवनस्तरमा सुधार ल्याएको छ र भविष्यमै यस्ता आपदाका बेला छिटो प्रतिक्रिया दिने आशा व्यक्त गरिएको छ।