अमेरिका र इरानबीच अप्रत्यक्ष वार्ता सकिएपछि नयाँ प्रतिबन्ध घोषणा

तेहरान । अमेरिकी राष्ट्रपति डोनाल्ड ट्रम्पको प्रशासनले इरानको तेल कारोबारसँग सम्बन्धित विभिन्न निकाय र व्यक्तिहरूमाथि नयाँ प्रतिबन्ध लगाएको छ। यस सूचीमा जम्मा १५ वटा संस्था, दुई जना व्यक्ति र १४ वटा छायाँ जहाज समूहका जहाजहरू समावेश भएका छन्।

अमेरिकी विदेश मन्त्रालयले जारी गरेको विज्ञप्तिमा भनिएको छ कि, इरानी शासनले गैरकानूनी रूपमा आफ्नो तेल र पेट्रोकेमिकल निर्यातलाई निरन्तरता दिँदै आएको छ। मन्त्रालयले स्पष्ट पारेको छ कि, नयाँ प्रतिबन्धको उद्देश्य इरानमाथि दबाब थप्नु र यसको तेल निर्यातलाई रोक्नु हो।

यो कदम विशेषगरी त्यतिबेला लिइएको हो, जब ओमानको मस्कटमा सम्पन्न अमेरिका र इरानबिचको अप्रत्यक्ष वार्ता सकिएको थियो। इरानको सरकारी समाचार संस्थाले जानकारी दिएको अनुसार, इरानी विदेश मन्त्री सैयद अब्बास अराघचीले उक्त वार्ता पूर्ण रूपमा आणविक विषयमाथि केन्द्रित रहेको बताएका छन्। उनले भने, “इरानले वाशिङ्टनसँग अन्य कुनै विषयमा छलफल गरेको छैन।”

अराघचीले विगतका अनुभव र व्यवहारका कारण, दुई देशबीच गहिरो अविश्वास कायम रहेको उल्लेख गरे। उनले भने, “यही अविश्वास नै वार्ताका लागि सबैभन्दा ठूलो चुनौती बनेको छ।” यो नयाँ प्रतिबन्ध र वार्ताका बीचको यस्तो स्थितिले इरानको तेल निर्यात र क्षेत्रीय राजनीति माथि थप प्रभाव पार्ने अपेक्षा गरिएको छ।