नेपाल–चीन सम्बन्ध सुदृढ बनाउने विषयमा परराष्ट्रमन्त्री खनाल र चिनियाँ विदेशमन्त्री वाङ यीसँग विस्तृत छलफल

काठमाडौं – परराष्ट्रमन्त्री शिशिर खनाल चीनको औपचारिक भ्रमण सकेर आज स्वदेश फर्किएका छन्। उनले केही समयअघि त्रिभुवन अन्तर्राष्ट्रिय विमानस्थलमा अवतरण गरेका हुन्। मन्त्री खनाल गत ३१ जेठमा चीनका विदेशमन्त्री वाङ यीको निम्तामा चीन भ्रमणमा गएका थिए।

चीनको बेइजिङमा परराष्ट्रमन्त्री खनालले चिनियाँ विदेशमन्त्री वाङ यीसँग द्विपक्षीय भेटवार्ता गरेका थिए। यस क्रममा दुवै देशका प्रतिनिधिमण्डलबीच नेपाल–चीन सम्बन्धका सबै पक्षहरूमा गहन र उपलब्धिमूलक छलफल भएको परराष्ट्र मन्त्रालयले जनाएकै छ।

मन्त्रालयले जारी गरेको विज्ञप्तिमा भनिएको छ, “आपसी मित्रता, सद्भावना र सहयोगमा आधारित नेपाल–चीन सम्बन्धलाई थप सुदृढ तुल्याउने विषयमा दुवै पक्षबीच सहमति भएको छ।”

द्विपक्षीय वार्ताका क्रममा पूर्वाधार, कनेक्टिभिटी, सीमा व्यवस्थापन, ऊर्जा, व्यापार, लगानी, कृषि, प्रविधि हस्तान्तरण, सूचना प्रविधि र डिजिटलाइजेशन, पर्यटन, रासायनिक मल, पेट्रोलियम तथा प्राकृतिक ग्यास अन्वेषण र जनस्तरको सम्बन्ध जस्ता विभिन्न क्षेत्रमा सहयोग विस्तार गर्ने विषयमा समेत छलफल भएको छ।

नेपाल र चीनबीचको सम्बन्धलाई थप बलियो बनाउने उद्देश्यले भएको यो भ्रमणले दुवै देशका बीचको मित्रता र सहयोगलाई नयाँ उचाइमा पुर्‍याउने अपेक्षा गरिएको छ।