भारत-नेपाल सम्बन्धलाई नयाँ उचाइमा पुर्‍याउने ऐतिहासिक अवसर : रवि लामिछाने

राष्ट्रिय स्वतन्त्र पार्टी (रास्वपा) का सभापति रवि लामिछानेले भारतीय दैनिक हिन्दुस्तान टाइम्समा प्रकाशित आफ्नो लेखमा नेपाल–भारत सम्बन्धलाई नयाँ ढंगले पुनर्स्थापित गर्ने उपयुक्त समय आएको बताएका छन्। उनले सीमा विवादको विषयलाई पनि सम्बोधन गर्दै दुई देशबीचको विश्वास, सहकार्य र मित्रतालाई अझ सुदृढ बनाउनुपर्ने आवश्यकता औंल्याएका छन्।

लेखमा उनले लेखेका छन्:

“इतिहासले कसैलाई पनि असीमित अवसर प्रदान गर्दैन; यसले केवल छोटो समयका अवसरहरू मात्र दिन्छ। सन् २०२६ को यो वर्तमान क्षण नेपाल–भारत सम्बन्धलाई पूर्ण रूपमा पुनर्स्थापित गर्दै नयाँ उचाइमा पुर्‍याउन दशकौंयताकै सबैभन्दा अनुकूल अवसर हो।

हामी सम्बन्धलाई पुनः परिभाषित र गहिरो बनाउन खोजिरहेका बेला, हामीसँग एउटा ऐतिहासिक आधारबिन्दु छ—अगस्ट ३, २०१४। त्यस दिन भारतीय प्रधानमन्त्री नरेन्द्र मोदीले केवल नेपालको संसदलाई सम्बोधन मात्र गरेनन्, नेपाली जनतासँग प्रत्यक्ष संवाद गर्न सडकमा समेत निस्किए। उनले नेपाल र भारतबीचको सम्बन्ध हिमालय र गंगाजत्तिकै पुरानो रहेको र यो केवल कागजी दस्तावेजमा सीमित नभएको बताएका थिए।

सीमाना अवरोध होइनन्, बरु दुई देशलाई जोड्ने पुल बन्नुपर्छ भन्ने साझा दृष्टिकोणलाई जोड दिने व्यक्ति पनि उनै थिए।त्यसयता बागमती र गंगामा धेरै पानी बगिसकेको छ। यी नदीहरूले पहाडसँग कुनै सम्झौता गर्दैनन्; उनीहरू आफ्नो बाटो आफैं बनाउँछन्। त्यसैगरी हामी पनि अघिबढ्नेछौं।हामीसँग अर्को विकल्प छैन, हामीले अगस्ट २०१४ को त्यो विश्वास र आत्मीयताको वातावरणमा फर्कनुपर्छ। र हामी फर्कनेछौं-पूर्ण इमान्दारिता र व्यवहारिक सोचका साथ। नयाँ सम्भावनाहरूको ढोका खोल्ने र पुराना मतभेदहरू अन्त्य गर्ने पुल निर्माणका लागि पहिलो ढुंगा बोक्न हामी तयार छौं।”