भक्तपुरमा पछिल्लो एक महिनामा १५२ आपराधिक मुद्दा दर्ता

भक्तपुर — भक्तपुर जिल्लामा पछिल्लो एक महिनामा १५२ वटा आपराधिक घटनाका मुद्दा दर्ता भएका छन्। यस अवधिमा प्रहरीले ११० जना अपराधीलाई पक्राउ गरी आवश्यक कारबाही अघि बढाएको छ। जिल्ला प्रहरी परिसर भक्तपुरले सोमबार सार्वजनिक गरेको प्रतिवेदनअनुसार, माघ महिनामा जघन्य र गम्भीर अपराधका घटनाहरूमा वृद्धि देखिएको हो।

प्रहरी प्रमुख एवं प्रहरी उपरीक्षक सूर्यबहादुर खड्काले बताए अनुसार, माघ महिनामा दुईवटा जघन्य हत्याका घटना घटेका छन्। यसका अतिरिक्त, लागुऔषध, बहुविवाह, बैंकिङ कसूर, ठगी, चोरी, जुवा र आत्महत्याका मुद्दाहरू पनि दर्ता भएका छन्। उनले थपे, यी घटनामा संलग्न ३२ अपराधीलाई कारागार चलान गरिएको छ भने २ वर्ष नौ महिना एक दिन कैद सजाय भुक्तान गराइएको छ। यस क्रममा रु ६७ लाख ४७ हजार ८० रुपैयाँ जरिवाना र बिगो सङ्कलन गरिएको जानकारी दिए।

उहाँले भक्तपुर नगरपालिका–३ वंशगोपालस्थित लालमाया तामाङको हत्यामा संलग्न अभियोगमा काभ्रे तिमाल गाउँपालिका–९ घर भई भक्तपुर नगरपालिका–३ बस्ने ३६ वर्षीय लनाम तामाङलाई पक्राउ गरी जेल चलान गरिएको बताए। साथै, मध्यपुरथिमि नगरपालिका–३ कौशलटारस्थित डेराकोठामा आफ्नै आमा ५० वर्षीया सरिता भण्डारीको हत्या अभियोगमा सिन्धुली कमलामाई नगरपालिका–६ बस्ने २७ वर्षीय प्रविन भण्डारीलाई पनि पक्राउ गरी जेलमा राखिएको छ।

महिला हिंसाका घटनाहरूमा ३६ उजुरी परेका मध्ये २६ वटा मिलापत्र भएका छन् भने १० वटाको अनुसन्धान भइरहेको छ। यसैगरी, ३२ जना नागरिक हराएका थिए, तीमध्ये २३ जना फेला परेका छन्। जिल्ला प्रशासन कार्यालयमार्फत आएका ४३ उजुरी मध्ये ३७ वटाको मिलापत्र भईसकेको छ।

सवारीसाधन सम्बन्धी घटनामा, माघ महिनामा २२७ सवारी दुर्घटना भएका छन्। यसमा ३४० वटा सवारीसाधन संलग्न थिए। घटनामा पाँचजनाको मृत्यु भएको छ भने १५५ जना घाइते भएका छन्। प्रहरीको उद्धार टोलीले १०० जना घाइतेलाई अस्पताल पुर्‍याएको र १,०६०७ सवारीसाधनलाई कारबाही गरि रु ११ लाख ४२ हजार २०० जरिवाना सङ्कलन गरेको जानकारी दिइएको छ।

प्रहरीले अपराध नियन्त्रण र सुरक्षा बृद्घि गर्नका लागि निरन्तर प्रयास गरिरहेको छ। यस प्रतिवेदनले भक्तपुर जिल्लामा कानून व्यवस्था कायम राख्नका लागि भइरहेको कार्यहरूलाई स्पष्ट देखाउँछ।