राप्तीसोनारी गाउँपालिका–९ गुरुवागाउँमा जङ्गली जनावरको आक्रमणबाट खत्रीको मृत्यु।

राप्तीसोनारी गाउँपालिका–९ गुरुवागाउँ निवासी ४० वर्षीय इन्द्रबहादुर खत्रीको जङ्गली जनावरको आक्रमणबाट मृत्यु भएको छ।

शुक्रबार अपराह्न करिब २ः०० बजे, खत्री स्थानीय रिम्ना सामुदायिक वनमा घाँस काट्न गएको बेला अचानक बेपत्ता भएको थिए। आज बिहानसम्म परिवारसँग सम्पर्कमा नआएपछि, स्थानीयवासी र प्रहरी टोलीले जंगलमा खोजी गर्दा उनको शव भेटिएको हो। प्रहरी चौकी ढकेरीका इन्चार्ज प्रहरी सहायक निरीक्षक नगेन्द्र शाहीले जानकारी दिए।

उनका अनुसार, शव जङ्गलको चिल्लेपाटामा रिम्ना सामुदायिक वनको क्षेत्रमा फेला परेको हो। शव परीक्षण र अन्य आवश्यक प्रक्रिया अघि बढाउन बाँके राष्ट्रिय निकुञ्जसँग समन्वय गरिएको छ।

प्रहरी र स्थानीयवासीको संयुक्त खोजीले शव भेटिएपछि, घटनाको प्रकृति हेर्दा बाघले नै आक्रमण गरेको हुनसक्ने बाँके राष्ट्रिय निकुञ्जका प्रमुख वरिष्ठ संरक्षण अधिकृत वीरेन्द्रप्रसाद कँडेलले बताए।

‘बाघ वा चितुवाले आक्रमण गरेको हुनुपर्छ, घटनास्थलको प्रकृति हेर्दा बाघको आक्रमण जस्तो देखिन्छ,’ उनले भने, ‘हामीले घटनास्थलमा क्यामेरा जडान गर्नेछौं, क्यामेरामा कैद भएका आधारमा पुष्टि हुनेछ।’