धादिङको गलौदीमा भासिएको पृथ्वी राजमार्ग शनिबार अपराह्नदेखि खुल्ने सम्भावना

धादिङ । पृथ्वी राजमार्गअन्तर्गत धादिङको गजुरी गाउँपालिका–५ स्थित गलौदी सडकखण्ड शनिबार अपराह्नदेखि सञ्चालनमा आउने सम्भावना रहेको सडक विभागले जनाएको छ।

त्रिशूली नदीको कटानका कारण सडक भासिएपछि राजमार्ग अवरुद्ध भएको थियो। सडकको अवस्था सामान्य रहेमा अपराह्न ४ बजेसम्म यातायात सञ्चालन गर्न सकिने विभागको अनुमान छ।

विभागले सामाजिक सञ्जालमार्फत स्थानीय निकायसँग छलफलपछि ‘ब्याक कटिङ’को काम सुरु गरिएको जानकारी दिएको छ। “सम्पूर्ण अवस्था सामान्य रहे करिब आठ घण्टामा, अर्थात् अपराह्न ४ बजेसम्म, यातायात सुचारु हुनेछ,” विभागको सूचनामा उल्लेख छ।

यसअघि स्थानीय निकायबाट अवरोध भएका कारण ‘ब्याक कटिङ’को काम सुरु गर्न नसकिएको पनि विभागले जनाएको छ। गलौदी सडकखण्ड गजुरीनजिक काठमाडौँतर्फ पर्छ। कामको प्रगति र सडकको अवस्थाअनुसार यातायात सञ्चालन हुने समय फरक पर्न सक्नेछ।