रवि लामिछाने र बालेन्द्र शाहको सहकार्यले नेपाली राजनीतिमा नयाँ टकरावको संकेत, हर्क साम्पाङ आक्रोशित

काठमाडौं — परम्परागत ठूला राजनीतिक शक्तिहरूलाई चुनौती दिँदै राष्ट्रिय स्वतन्त्र पार्टीका सभापति रवि लामिछाने र काठमाडौं महानगरपालिकाका मेयर बालेन्द्र शाहले एकै ठाउँ उभिएपछि धरान उपमहानगरपालिकाका मेयर हर्क साम्पाङ आक्रोशित भएका छन्।

आइतबार बिहान, रवि लामिछाने र बालेन्द्र शाहबीच सात बुँदे सहमति भएको र बालेन्द्र शाह रास्वपामा प्रवेश गर्ने निर्णय सार्वजनिक भएपछि हर्क साम्पाङले सामाजिक सञ्जाल फेसबुकमा तीव्र प्रतिक्रिया जनाएका छन्। उनले दर्जनभन्दा बढी स्टाटस लेख्दै आफ्नो असन्तुष्टि व्यक्त गरेका हुन्।

सहमतिपछि नौ महिनाको कारागार जीवनबाट छुट्टिएर आएको रवि–बालेन्द्रको संवाद र सहकार्यलाई वैकल्पिक राजनीतिमा ठूलो सफलता मानिएको छ। तर, यस घटनाले हर्क साम्पाङ र उनका समर्थकहरूमा आक्रोश थपाएको छ।

आइतबार बिहानैदेखि उनले फेसबुकमा पहिलो स्टाटस लेख्दै भने, “सिंहदरबार जलाउँछु भन्ने र जलाएरै देखाउनेदेखि सावधान! देश सिध्याउँछन् यी विदेशी दलालहरूले!” यससँगै उनले नेतृत्व, सत्ता, मिडिया र वैकल्पिक राजनीतिलाई लक्षित गर्दै निरन्तर प्रतिक्रिया जनाए। उनले आफ्नो ‘श्रम संस्कृति’ नै वास्तविक परिवर्तनको आधार भएको दावी पनि दोहोर्‍याएका छन्।

साम्पाङको पछिल्लो स्टाटसमा उनले भने, “श्रम संस्कृतिले ल्याउने छ बहुमत! अरु त मिडिया ट्रायल मात्रै हो! जनतामा जानु कता हो कता प्रधानमन्त्री रे!” यसले उनी र उनका समर्थकहरूबीचको आन्तरिक असन्तुष्टि र नेतृत्व प्रतिस्पर्धाको संकेत देखिएको छ।

यस नयाँ राजनीतिक समीकरणले आगामी दिनमा वैकल्पिक शक्तिहरूबीच थप तरंग ल्याउने अपेक्षा गरिएको छ। रवि–बालेन्द्रको सहकार्यसँगै नेपाली राजनीतिमा नयाँ टकराव र शक्ति प्रतिस्पर्धाको संकेत देखिएको छ।

यो घटनाले नेपाली राजनीतिक मञ्चमा नयाँ आयाम थप्ने अपेक्षा गरिएको छ, जहाँ वैकल्पिक शक्तिहरूबीचको प्रतिस्पर्धा अझ तीव्र हुने देखिन्छ।