मधेस प्रदेशका मुख्यमन्त्री यादवको राजीनामा: सर्वोच्चको परमादेशपछि विश्वासको मत नलिँदै पदबाट हटे

काठमाडौँ । मधेस प्रदेशका मुख्यमन्त्री सरोजकुमार यादवले अन्ततः पदबाट राजीनामा दिएका छन्। बुधबार विश्वासको मत लिने उद्देश्यले बसेको प्रदेशसभा बैठकलाई सम्बोधन गर्दै उनले आफ्नो राजीनामाको घोषणा गरेका हुन्। सर्वोच्च अदालतको परमादेशपछि यादव राजनीतिक दबाबमा परेका थिए।

सर्वोच्च अदालतले सोमबार साँझ मुख्यमन्त्री यादवलाई २४ घण्टाभित्र विश्वासको मत लिन निर्देशन दिएको थियो। सोही आदेशअनुसार बिहानै प्रदेशसभा बैठक बोलाइए पनि सत्तारूढ गठबन्धनका केही सांसदहरू अनुपस्थित भएपछि बैठक दिउँसो २ बजेसम्म स्थगित गरिएको थियो।

पुनः बसेको बैठकमा विश्वासको मत नपाउने परिस्थिती स्पष्ट बनेपछि मुख्यमन्त्री यादवले सभामुखको अनुमति लिएर पदबाट राजीनामा घोषणा गरे। उनले वर्तमान राजनीतिक अवस्थाले आफूलाई विश्वासको मत हासिल गर्ने स्थिति नभएको बताएका थिए।

यादव कात्तिक २३ गते संविधानको धारा १६८ को उपधारा ३ बमोजिम मधेस प्रदेशका मुख्यमन्त्री नियुक्त भएका थिए। तर, उनकी नियुक्ति असंवैधानिक भएको दाबी गर्दै प्रदेशकै सात दलका सांसदहरू सर्वोच्च अदालत पुगेका थिए। सर्वोच्चले विपक्षी दलहरूको दाबीलाई प्राथमिकता दिँदै विश्वासको मत लिने आदेश जारी गरेको थियो।

यादवको राजीनामासँगै मधेस प्रदेशमा फेरि नयाँ सत्ता व्यवस्थापनका लागि राजनीतिक चलहल चल्न थालेको छ। अब नयाँ सरकार गठनका लागि संविधानिक प्रक्रियाअनुसार दलहरू सक्रिय हुने अपेक्षा गरिएको छ।