जेनजी युवाले वार्तामा बस्न अस्वीकार; मुक्का हान्ने पक्राउ नभएसम्म वार्ता नबसीने अडान

काठमाडौं — स्थानीय प्रशासनले वार्तामा बस्न बोलाएको प्रस्तावलाई आन्दोलनरत जेनजी युवाले अस्वीकार गरेका छन्। जिल्ला प्रशासन कार्यालय बाराले संवादबाटै समाधान निकाल्न सकिने विश्वास व्यक्त गर्दै आन्दोलनरत पक्षलाई वार्तामा बोलाएको थियो। तर, उनीहरूले बुधबार कुटपिट गर्ने एमाले युवा संघका स्थानीय नेता अरविन्द साहलाई पक्राउ नगरेसम्म वार्तामा नबस्ने अडान राखेका छन्।

बाराका प्रमुख जिल्ला अधिकारी धर्मेन्द्रकुमार मिश्रले जेनजी अगुवा सम्राट उपाध्यायलाई टेलिफोन गरेर वार्ताका लागि आह्वान गरेका थिए। सहायक प्रमुख जिल्ला अधिकारी छविरमण भट्टराईका अनुसार, जेनजी समूहले वार्ता टोलीलाई घटनास्थलमै बोलाएको थियो।

जेनजी अगुवा उपाध्यायका अनुसार, वार्तामा बस्नुअघि अरविन्द साहलाई पक्राउ गर्नुपर्ने शर्त आन्दोलनरत युवाको छ। युवा संघका स्थानीय नेता साहले नै बुधबार जेनजी युवामाथि पहिलो मुक्का प्रहार गरेको आरोप लगाएका छन्। उनी हालसम्म फरार छन्।