सडक डिभिजन विराटनगरले तोड्यो दुई ठेक्का, ३० दिनभित्र वित्तीय फरफारक गर्न अल्टिमेटम

काठमाडौं । सडक डिभिजन विराटनगरले कामको प्रगति सन्तोषजनक नभएको भन्दै दुई निर्माण कम्पनीसँगका ठेक्का तोडेको छ। डिभिजनले एम/एस हिम सगरमाथा–बी एन्ड बी–आर वान जेभी, काठमाडौं र एमएस कृष्ण निर्माण सेवा, सुनसरीसँगका ठेक्का रद्द गरेको हो।

हिम सगरमाथा–बी एन्ड बी–आर वान जेभीले महेन्द्र राजमार्गको इटहरी–मावा खोला पुल तथा इनरुवा–सखुवागाछी सडकखण्डको नियमित मर्मतको जिम्मा पाएको थियो। उक्त कम्पनीलाई कोशी राजमार्गको धरान–भेडेटार खण्ड मर्मत गर्ने जिम्मेवारीसमेत दिइएको थियो।

त्यस्तै, कृष्ण निर्माण सेवा, सुनसरीले मोरङको जरुवापानी होली कल्भर्ट निर्माणको ठेक्का पाएको थियो।

डिभिजनका अनुसार दुवै कम्पनीको मर्मत तथा निर्माण कार्यको प्रगति सन्तोषजनक थिएन। कार्यप्रगतिमा सुधार गर्न पटक–पटक मौखिक तथा लिखित निर्देशन दिँदा पनि काम अघि नबढेको र पेस गरिएको कार्यतालिकाअनुसार निर्माण कार्य नभएको कार्यालयले जनाएको छ। ठेक्का तोडेपछि कार्यालयले दुवै कम्पनीलाई ३० दिनभित्र सम्पर्कमा आई वित्तीय फरफारक गर्न अल्टिमेटम दिएको छ।