स्वास्थ्य विज्ञान प्रतिष्ठानको मेडिकल भवन निर्माणमा ढिलाइ, मन्त्री घिसिङको कडा चेतावनी
- कास्की — पोखरा स्थित पोखरा स्वास्थ्य विज्ञान प्रतिष्ठानको मेडिकल भवन निर्माण कार्य पाँच वर्षदेखि टुङ्गो नलागि रहेको छ।
- माघ २०७७ मा २० महिनाभित्र सम्पन्न गर्ने गरी ठेक्का सम्झौता भएको यस परियोजनामा हालसम्म मात्र ५१ प्रतिशत प्रगति भएको हो।
कास्की — पोखरा स्थित पोखरा स्वास्थ्य विज्ञान प्रतिष्ठानको मेडिकल भवन निर्माण कार्य पाँच वर्षदेखि टुङ्गो नलागि रहेको छ। माघ २०७७ मा २० महिनाभित्र सम्पन्न गर्ने गरी ठेक्का सम्झौता भएको यस परियोजनामा हालसम्म मात्र ५१ प्रतिशत प्रगति भएको हो। थपिएको समयावधि पनि गत साउनमा समाप्त भएको छ।
सहरी विकास मन्त्रालय अन्तर्गतको संघीय शहरी भवन कार्यालय पोखराबाट निर्माणाधीन यो भवनको लागत करिब १० करोड ५५ लाख (कर बाहेक) रहेको छ। तर, निर्माण कार्यमा भएको ढिलाइले जनस्वास्थ्य सेवामा समस्या निम्त्याएको भन्दै मन्त्रालयले गम्भीर ध्यानाकर्षण गराएको छ।
आइतबार, ऊर्जा, जलस्रोत तथा सिँचाइ, भौतिक पूर्वाधार तथा यातायात र शहरी विकास मन्त्री कुलमान घिसिङले निर्माण स्थलको अनुगमन गरेका थिए। उनले निर्माण कार्यको प्रगतिको अवस्थाबारे जानकारी लिँदै, निर्माण सम्पन्न हुने समयतालिका र अन्य विषयमा महाशाखा प्रमुख, प्रतिष्ठानका उपकुलपति र निर्माण व्यवसायीसँग छलफल गरे।
मन्त्री घिसिङले अस्पताल जस्ता संवेदनशील र जनताको प्रत्यक्ष स्वास्थ्य सेवासँग सम्बन्धित संरचनाको निर्माणमा ढिलाइ भएकोमा आक्रोश व्यक्त गरे। उनले यसलाई तत्कालै समाधान गर्नुपर्ने र अब यथास्थितिमा राख्न नसक्ने बताए। साथै, उनले यदि निर्माण कार्यलाई समयमै सुरु नगरेमा ठेक्का तोड्ने र कारबाहीको प्रक्रिया अघि बढाउने चेतावनी दिए।
उनले एक हप्ता भित्र निर्माणको गति नबढेमा, ठेक्का तोड्ने प्रक्रिया अघि बढाउने निर्देशन दिए। यसैबीच, प्रतिष्ठानका उपकुलपति भरत खत्रीले भने, भवनको अभावले स्वास्थ्य सेवा प्रवाहमा समस्या देखिएको भएकाले, अविलम्ब निर्माण कार्य सम्पन्न गर्न आवश्यक रहेको र यदि गर्न नसके भने नयाँ प्रक्रियामा जानु पर्ने औंल्याए।
यस विषयमा मन्त्रालयले कडा ध्यान राख्दै, निर्माण कार्यलाई तीव्रता दिन र समयमा सम्पन्न गर्न आवश्यक कदम चाल्ने प्रतिबद्धता व्यक्त गरेको छ।
प्रतिक्रिया
यो पनि पढौँ
यो पनि पढौँ
