सडकका संरचना बिगारेर दुर्घटना गराए कडा सजाय हुने प्रस्ताव

काठमाडौं । सडक खन्ने क्रममा सुरक्षा संरचना, ट्राफिक चिह्न वा बार भत्काएर अलपत्र छाड्ने व्यक्ति तथा संस्थालाई कानुनी दायरामा ल्याउने व्यवस्था प्रस्ताव गरिएको छ।

सङ्घीय संसद्मा पेस भएको **सडक सुरक्षा सम्बन्धमा व्यवस्था गर्न बनेको विधेयक, २०८३** ले सडकका संरचना बिगार्दा वा हटाउँदा सडक जोखिमपूर्ण भई दुर्घटना भएमा त्यसमा संलग्न व्यक्ति वा संस्थालाई प्रचलित कानुनबमोजिम सजाय गर्ने प्रस्ताव गरेको हो।

विधेयकको दफा १३ को उपदफा (२) मा सडक सीमाभित्रका संरचना भत्काउने, बिगार्ने वा हटाउने कार्यका कारण सडक दुर्घटना भएको देखिएमा संलग्न पक्षलाई सजाय हुने व्यवस्था छ। यस प्रावधानले सडक खनेर खाल्डो नपुरी छाड्ने निर्माण व्यवसायी, खानेपानी तथा ढल निर्माणमा संलग्न निकाय र ट्राफिक चिह्न वा सुरक्षा संरचना बिगार्ने व्यक्ति तथा संस्थालाई जिम्मेवार बनाउनेछ।

विधेयकले सडक संरचनाको परिभाषामा सडक पेभमेन्ट, सडक किनार, सडकपेटी, ट्राफिक चिह्न तथा विद्युतीय सङ्केत, पैदलयात्री आकाशे पुल, अन्डरपास, बस बिसौनी, पार्किङ लेन, प्यारापेट ब्लक र स्टिल क्र्यास ब्यारियरलगायत सार्वजनिक भौतिक पूर्वाधार समेटेको छ।

त्यस्तै, सडक निर्माण वा स्तरोन्नति गर्दा सडक सीमाभित्र रहेका रुख, बिजुलीका पोल, टेलिफोनका तार तथा खानेपानी र ढल निकास प्रणालीलाई सडक सुरक्षामा असर नपर्ने गरी व्यवस्थापन गर्न सम्बन्धित निकायलाई निर्देशन दिन सक्ने व्यवस्था पनि विधेयकमा प्रस्ताव गरिएको छ।