वीरगञ्जबाट ७ ग्राम ब्राउन सुगरसहित भारतीय युवक दिनेश प्रसाद पक्राउ

वीरगञ्ज — लागूऔषध ब्राउन सुगरको खरिद, बिक्री र ओसारपसारमा संलग्न रहेको एक भारतीय युवकलाई वीरगञ्जबाट पक्राउ गरिएको छ। जिल्ला प्रहरी कार्यालय पर्साका अनुसार, विशेष सूचनाका आधारमा खटिएको प्रहरी टोलीले वीरगञ्ज महानगरपालिका–२१ परवानीपुर चोकमा भारतबाट आउँदै गरेको कारलाई रोकि जाँच गर्दा युवकलाई ब्राउन सुगरसहित पक्राउ गरेको हो।

प्रहरीका अनुसार, कारको चालक बस्ने सिटको माथिल्लो भागमा लुकाइछिपाइ राखिएको प्लास्टिकभित्र ७ ग्राम लागूऔषध ब्राउन सुगर फेला परेकाे हो। प्रहरी प्रवक्ता एवं डीएसपी चक्रबहादुर मल्लका अनुसार, पक्राउ परेका युवकको नाम भारत बिहारका रक्सौल निवासी ३१ वर्षीय दिनेश प्रसाद हो।

प्रहरीले भारतीय नम्बरको डीएल १२ सीएल १९८४ नम्बरको कार र ब्राउन सुगरसहित युवकलाई थप अनुसन्धानका लागि जिल्ला प्रहरी कार्यालयको हिरासत कक्षमा राखिएको जनाएको छ। प्रहरीको अनुसन्धान जारी रहेको छ र पक्राउ परेका युवकको सम्बन्धमा थप जानकारी प्राप्त गर्न प्रहरी संलग्न रहेको छ।