गौरमा म्याद गुज्रिएका खाद्यवस्तु बिक्रीका लागि राखेको भेटिएपछि डेरी पसललाई २ लाख जरिवाना

रौतहट । रौतहटको गौरमा गरिएको बजार अनुगमनका क्रममा म्याद गुज्रिएका तथा गुणस्तरमा समस्या देखिएका खाद्यवस्तु बिक्रीका लागि राखेको भेटिएपछि एक डेरी तथा मिठाई पसललाई २ लाख रुपैयाँ जरिवाना गरिएको छ।

वाणिज्य, आपूर्ति तथा उपभोक्ता संरक्षण कार्यालय वीरगन्ज, जिल्ला प्रशासन कार्यालय रौतहट, गौर नगरपालिका र उद्योग वाणिज्य संघका प्रतिनिधिसहितको संयुक्त टोलीले गौरस्थित फुलतारा डेरी एन्ड स्विट्स भण्डारमा अनुगमन गरेको थियो। अनुगमनका क्रममा कैफियत भेटिएपछि पसललाई जरिवाना गरिएको टोलीले जनाएको छ।

टोलीले खाद्यवस्तुको म्याद र लेबल, भण्डारणको अवस्था, मूल्यसूची तथा बिल–बिजकसमेत जाँच गरेको थियो।

यसैबीच, गौर क्षेत्रका माछा तथा मासु पसलमा पनि अनुगमन गरिएको छ। अनुगमनका क्रममा व्यवसायीलाई मूल्यसूची राख्न, व्यवसाय दर्ता गर्न, सरसफाइ कायम गर्न र स्वच्छ तथा गुणस्तरीय माछा–मासु बिक्री गर्न निर्देशन दिइएको जिल्ला प्रशासन कार्यालय रौतहटका प्रतिनिधि उमेशकुमार साहले बताए।

निर्देशन पालना नगरे आगामी अनुगमनमा प्रचलित कानुनअनुसार जरिवाना तथा अन्य कारबाही गरिने टोलीले चेतावनी दिएको छ। चाडपर्व नजिकिँदै जाँदा खाद्यवस्तुको कारोबार बढ्ने भएकाले बजार अनुगमनलाई निरन्तरता दिइने टोलीले जनाएको छ।