सभामुख डोलप्रसाद अर्याल र राजदूत शफिकुर रहमानबीच शिष्टाचार भेटवार्ता

काठमाडौँ — नेपालका सभामुख डोलप्रसाद (डीपी) अर्याल र बङ्गलादेशका महामहिम राजदूत मो. शफिकुर रहमानबीच शिष्टाचार भेटवार्ता सम्पन्न भएको छ। यस अवसरमा नेपाली संसदको उच्च सदनका सभामुख अर्यालले नेपाल–बङ्गलादेश सम्बन्धलाई सार्वभौमिक समानता, आपसी सम्मान र विश्वासमा आधारित रहेको बताए।

सभामुख अर्यालले नेपालले बङ्गलादेशसँगको सम्बन्धलाई उच्च महत्त्व दिँदै आएको बताएका छन्। उनले भन्नुभयो, “नेपाल र बङ्गलादेशबीचको सम्बन्ध एकअर्काप्रति सम्मान र विश्वासको आधारमा स्थापित छ। हामी दुवै देशका जनताको हितमा अझ मजबूत र दीर्घकालीन सहकार्यका लागि प्रतिबद्ध छौं।”

भेटमा सभामुख अर्यालले बङ्गलादेशका जनताबाट प्राप्त जनादेशमा आधारित नयाँ सरकारप्रति शुभकामना व्यक्त गर्नुभएको थियो। उनले भने, “म नयाँ सरकारको सफल कार्यकालको कामना गर्दछु, जसले दुवै देशको विकास र समृद्धिमा महत्वपूर्ण योगदान पुर्याओस्। नेपालमा पनि भर्खरै सफलतापूर्वक सम्पन्न भएको निर्वाचनपछि नयाँ सरकार गठन भएकोले हाम्रो सहयोग थप सुदृढ हुने विश्वास छ।”

उहाँले नेपालको विकास यात्रामा बङ्गलादेशका सफल अभ्यासहरू उपयोगी हुन सक्ने धारणा व्यक्त गर्नुभयो। “दुवै देशको सहकार्यले जनताको सुख, समृद्धि र कल्याणमा ठूलो योगदान पुर्‍याउनेछ,” उहाँले थप्नुभयो।

सहकार्यका क्षेत्रहरूमा खेलकुद, पर्यटन, सांस्कृतिक आदानप्रदान र जनस्तरीय सम्पर्कलाई उच्च प्राथमिकता दिइएको छ। सभामुख अर्यालले फुटबल, क्रिकेट, भलिबलजस्ता खेलमार्फत युवा पुस्ताबीच मित्रता र समझदारी बढिरहेको बताए। साथै, पर्यटन र सांस्कृतिक कार्यक्रमले सम्बन्धलाई अझ प्रगाढ बनाउने विश्वास व्यक्त गरे।

यसैगरी, उनले शिक्षा, स्वास्थ्य, कृषि, जलवायु परिवर्तन र क्षेत्रीय सहकार्यका विविध विषयमा छलफल भएको बताए। विशेष गरी चिकित्सा शिक्षा र प्राविधिक अध्ययनरत नेपाली विद्यार्थीहरूको योगदानको उनले प्रशंसा गरे।

जलवायु परिवर्तनको साझा चुनौतीबारे चर्चा गर्दै सभामुख अर्यालले हिमाली क्षेत्रको वातावरणीय जोखिम र समुद्री तटीय क्षेत्रका समस्याहरू दुवै मुलुकका साझा सरोकार भएको बताए। राजदूत रहमानले पनि जलवायु परिवर्तन, प्राकृतिक विपद्, विकास र आर्थिक परिवर्तनका क्षेत्रहरूमा सहकार्य गर्न आवश्यक रहेको बताएका छन्।

राजदूत रहमानले नेपाल र बङ्गलादेशबीच ऊर्जा, व्यापार, पर्यटन, शिक्षा, स्वास्थ्य र जनस्तरीय सम्बन्धका क्षेत्रमा सहकार्यलाई थप विस्तार गर्न बङ्ग्लादेश सरकार सकारात्मक रहेको जानकारी दिए। उहाँले दक्षिण एसियाली क्षेत्रीय सहयोगलाई अझ प्रभावकारी बनाउँदै साझा हितका विषयहरूमा मिलेर काम गर्नुपर्ने आवश्यकतामा जोड दिनुभयो।

दुवै देशबीचको दीर्घकालीन र मित्रवत सम्बन्धलाई अझ प्रगाढ बनाउने उद्देश्यले भएको यो भेटले क्षेत्रीय स्थिरता र समृद्धिमा महत्वपूर्ण भूमिका खेल्ने अपेक्षा गरिएको छ।