सप्तरीका शिक्षक श्रावण राममाथि विदेश पठाउने प्रलोभनमा ठगीको आरोप, पीडितहरूले कारबाही र रकम फिर्ताको माग

महेश सिंह सिरहा – सप्तरीको सुरुङ्गा नगरपालिका–९ प्रमाणपुरका स्थानीय शिक्षक श्रावण राममाथि वैदेशिक रोजगारको नाममा गाउँका नागरिकहरूलाई ठगी गरेको आरोप लागेको छ। पीडितहरूले बताएका छन् कि, उनले विश्वास जितेर बिदेश पठाउने प्रलोभन देखाउँदै लाखौँ रुपैयाँ असुली गरेका हुन्।

प्रमाणपुरका राधेश्याम चौधरीले आफ्ना कान्छा छोरा पशुपति चौधरीलाई बिदेश पठाउने क्रममा शिक्षक श्रावण रामलाई रु. २ लाख २५ हजार ६ सय २५ रुपैयाँ बुझाएका थिए। उनले बताउँछन्, “दुबै पठाइदिन्छु” भन्ने आश्वासन दिएर रकम लिएका थिए। तर, पैसा तिरेर पनि छोरा पशुपति हाल दुबईमा अलपत्र परेका छन्। तीन महिना बितिसक्दा पनि कुनै काम नपाएको र तलबसमेत नपाएको परिवारको भनाइ छ।

ठगिएका पीडितहरूमा गजेन्द्र चौधरी पनि छन्, जसलाई श्रावण रामले “क्लिनर मार्केट” अर्थात सरसफाइको काम दिने भन्दै बिदेश पठाएका थिए। तर, प्रतिवद्धता अनुसारको काम नपाई उनी पनि अलपत्र परेका छन्। उनका अनुसार, तलब रोकिएको र कामको व्यवस्था नभएको परिवारले बताए।

त्यस्तै, रामजिवन चौधरीका छोरा सुनिल चौधरीले पनि दुबई पठाउने भन्दै श्रावण रामलाई रु. १ लाख १७ हजार बुझाएका थिए। उनीहरूका अनुसार, श्रावण रामले राहदानी संकलन गरी गाउँका युवाहरूबाट रकम असुलेका छन्। यसरी, पीडितहरूले उनीमाथि ठगीको गम्भीर आरोप लगाएका छन्।

पीडित पक्षका अनुसार, सुरुङ्गा–४ का देवेंद्र चौधरीको रोहबरमा श्रावण रामले १५ दिनभित्र काम उपलब्ध गराउने र सम्झौता अनुसारको तलब दिने वाचा गरेका थिए। तर, त्यो वाचा विपरीत कुनै व्यवस्था नगरी उनीहरूले रकम ठगी गरेका हुन्।

स्थानीयवासीहरूका अनुसार, शिक्षकको हैसियतमा रहेर यस्तो कार्य गर्नु निन्दनीय हो। उनीहरूले भने, “शिक्षकजस्तो जिम्मेवार पेशामा रहेर यस्ता कार्य गर्नु निन्दनीय छ, उनले सम्पूर्ण शिक्षक समुदायको बदनाम गरेका छन्।”

पीडितहरूले शिक्षा शाखा प्रमुख र जिल्ला शिक्षा समन्वय इकाइलाई तत्काल कारबाही गर्न माग गरेका छन्। उनीहरूले भनेका छन् — “हामीले दिएको रकम ब्याजसहित फिर्ता गरियोस् र अलपत्र परेका युवाहरूलाई सुरक्षित रूपमा नेपाल फर्काइयोस्।”

यस घटनाले गाउँमा व्यापक चासो र आक्रोश जन्माएको छ। स्थानीय निकाय र प्रशासनले यस विषयमा छानबिन गर्न र दोषीविरुद्ध कडाइका साथ कारबाही गर्ने प्रतिबद्धता जनाएको छ।