कास्की जेलबाट फरार रहेका कैदी सूर्य बहादुर घर्ती क्षेत्री पक्राउ

कास्कीमा गत भदौ महिनामा भएको जेनजी आन्दोलनको फाइदा उठाउँदै कारागारबाट फरार भएका एक कैदीलाई प्रहरीले ६ महिनापछि पोखराको पृथ्वीचोकबाट पक्राउ गरेको छ। पक्राउ पर्ने व्यक्ति डाँकाचोरी मुद्दामा सजाय भुक्तान गरिरहेका कास्कीको माछापुच्छ्रे गाउँपालिका वडा नं. ४ लाचोक निवासी सूर्य बहादुर घर्ती क्षेत्री हुन्।

उनलाई नेपाल प्रहरीको विशेष संयुक्त टोलीले मंगलबार नियन्त्रणमा लिएको हो। उनी २०८२ साल भदौ २४ गते भएको आन्दोलन र अराजकताका समयमा सुरक्षा घेरा तोडेर फरार भएका थिए। लामो समयदेखि फरार रहेका घर्ती क्षेत्रीको खोजीका लागि नेपाल प्रहरी प्रदेश कार्यालय पोखरा र जिल्ला प्रहरी कार्यालय कास्कीले संयुक्त रूपमा विशेष टोली परिचालन गरेका थिए।

स्रोतका अनुसार, प्रहरी टोलीले सुराकीको आधारमा फागुन २५ गते दिउँसो करिब १२:४५ बजे पोखरा महानगरपालिका वडा नं. ९ स्थित पृथ्वीचोकमा लुकिछिपी बसिरहेको अवस्थामा उनलाई फेला पारेको हो। प्रहरीले उनलाई तत्काल नियन्त्रणमा लिएर आवश्यक कानुनी प्रक्रिया पूरा गरेपछि पुनः कास्की कारागार पठाइएको छ। प्रहरीले यस घटनामा थप अनुसन्धान गरिरहेको र फरार व्यक्तिको खोजी र पक्राउ कारवाही जारी रहने जनाएको छ।